រលកយក្សស៊ូណាមិ បំផ្លាញផ្ទះសំបែង និងបណ្ដាលឲ្យមនុស្សស្លាប់នៅឥណ្ឌូណេស៊ីកាលពីម្សិលមិញ
រលកយក្សស៊ូណាមិ បំផ្លាញផ្ទះសំបែង និងបណ្ដាលឲ្យមនុស្សស្លាប់នៅឥណ្ឌូណេស៊ីកាលពីម្សិលមិញរលកយក្សស៊ូណាមិ ដែលមានកម្ពស់ ២ម៉ែត្រ បានវាយប្រហារទៅលើក្រុង Palu និង Donggala ដែលជាប់សមុទ្រ ប្រទេសឥណ្ឌូណេស៊ី កាលពីថ្ងៃសុក្រ បណ្ដាលឲ្យរលំផ្ទះ កាត់ផ្តាច់អគ្គិសនី និងបណ្ដាលឲ្យមានមនុស្សស្លាប់មួយចំនួន។
រលកយក្សស៊ូណាមិនេះ បង្កឡើងដោយរញ្ជួយដីកម្រិត ៧,៥ រ៉ិចទ័រ ដែលមានចម្ងាយប្រមាណ ២៧គីឡូម៉ែត្រ ពីក្រុងដែលទទួលផលប៉ះពាល់។
អ្នកនាំពាក្យទីភ្នាក់ងារគ្រោះមហន្តរាយ បានឲ្យដឹងថា ចំនួនអ្នកស្លាប់មិនទាន់ត្រូវបានដឹងនៅឡើយ ប៉ុន្តែរបាយការណ៍បឋមបង្ហាញថា មានអ្នកស្លាប់ដោយសារការរលំបាក់អគារ។
មនុស្សជាង ៦០ម៉ឺននាក់ រស់នៅក្រុង Palu និង Donggala ។
កងកម្លាំង និងភ្នាក់ងារជួយសង្គ្រោះ បានចុះទៅដល់ទីតាំង និងប្រើប្រាស់កប៉ាល់ ព្រមទាំងឧទ្ធម្ភាគចក្រ ដើម្បីជួយសម្រួលដល់ប្រតិបត្តិការរបស់ខ្លួន។
សូមរំឭកថា ក្រុង Palu ដែលធ្លាប់រងការរញ្ជួយដី កម្រិត ៦,២ រ៉ិចទ័រ កាលពីឆ្នាំ២០០៥ គឺជាតំបន់ទេសចរណ៍ឆ្នេរ ដែលទាក់ទាញអ្នកទេសចរជាច្រើន។
កាលពីឆ្នាំ២០០៤ រញ្ជួយដីមួយដែលបង្កឡើងនៅភាគខាងជើងកោះស៊ូម៉ាត្រា ប្រទេសឥណ្ឌូណេស៊ី បានបង្កជារលកយក្សស៊ូណាមិ បណ្ដាលឲ្យមានមនុស្សស្លាប់ ២២៦០០០នាក់ ក្នុង ១៣ប្រទេស។ ក្នុងនោះ ឥណ្ឌូណេស៊ី មានអ្នកស្លាប់ច្រើនជាងគេ ចំនួន ១២ម៉ឺននាក់៕
ទស្សនាវីដេអូផ្សេងៗ៖
ប្រភព៖ ខ្លីៗ
