ខ្មែរប៉ុស្ដិ៍ Close

លោកនាយករដ្ឋមន្រ្តី ហ៊ុន សែន និង ឯកអគ្គរដ្ឋទូតអាមេរិក បង្ហាញជំហរប្រឹងប្រែងធ្វើឱ្យទំនាក់ទំនងប្រទេសទាំងពីរកាន់តែប្រសើរ

ដោយ៖ សន ប្រាថ្នា ​​ | ថ្ងៃអង្គារ ទី២០ ខែវិច្ឆិកា ឆ្នាំ២០១៨ ព័ត៌មានទូទៅ 1501
លោកនាយករដ្ឋមន្រ្តី ហ៊ុន សែន និង ឯកអគ្គរដ្ឋទូតអាមេរិក បង្ហាញជំហរប្រឹងប្រែងធ្វើឱ្យទំនាក់ទំនងប្រទេសទាំងពីរកាន់តែប្រសើរលោកនាយករដ្ឋមន្រ្តី ហ៊ុន សែន និង ឯកអគ្គរដ្ឋទូតអាមេរិក បង្ហាញជំហរប្រឹងប្រែងធ្វើឱ្យទំនាក់ទំនងប្រទេសទាំងពីរកាន់តែប្រសើរ

លោកនាយករដ្ឋមន្រ្តី ហ៊ុន សែន និងឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា ដែលចប់អាណត្តិការងារលោក William Heidt បានលើកឡើងដូចគ្នាថា នឹងប្រឹងប្រែងធ្វើឱ្យទំនាក់ទំនង ក៏ដូចជាកិច្ចសហប្រតិបត្តិការរវាងកម្ពុជា និងអាមេរិក កាន់តែល្អប្រសើរឡើងថែមទៀត។ ការបញ្ជាក់បែបនេះ បានធ្វើឡើងក្នុងពេលលោកនាយករដ្ឋមន្រ្តី ហ៊ុន សែន អនុញ្ញាតឱ្យលោកឯកអគ្គរដ្ឋទូតចូលជម្រាបលានាព្រឹកថ្ងៃទី២០ ខែវិច្ឆិកា ឆ្នាំ២០១៨នេះ នៅវិមានសន្តិភាព រាជធានីភ្នំពេញ។

លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានប្រាប់ក្រុមអ្នកសារព័ត៌មាននៅក្រោយជំនួបថា «ឯកឧត្តម ឯកអគ្គរដ្ឋទូតនៅក្នុងជំនួបនេះ បានជម្រាបជូនសម្តេចតេជោថា ក្នុងអំឡុងពេលលោកបម្រើតួនាទី អស់រយៈពេលជាង៣ឆ្នាំ នៅកម្ពុជានេះ ឯកឧត្តមបានខិតខំធ្វើយ៉ាងណាឲ្យទំនាក់ទំនងទ្វេរភាគីនៃប្រទេសទាំងពីរ មានការរីកចម្រើន។ ជាពិសេសមានចំណុចជាច្រើន ដែលឯកឧត្តម ឯកអគ្គរដ្ឋទូត និងសម្តេចតេជោ បានឯកភាពគ្នា»។

លោក កៅ គឹមហួន បន្តថា «ឯកឧត្តម បានលើកឡើងដែរថា កិច្ចសហប្រតិបត្តិការកម្ពុជា និងសហរដ្ឋអាមេរិក មានការរីកចម្រើនខ្លាំង ជាពិសេសលើវិស័យបរិស្ថាន វិស័យសេដ្ឋកិច្ច មានការនាំចេញទំនិញពីកម្ពុជា ទៅកាន់ទីផ្សារសហរដ្ឋអាមេរិក ហើយជាពិសេសទៀត អ្វីដែលកន្លងមកមានការអាក់ខាននោះ ក៏បានចាប់ផ្តើមឡើងវិញ ដូចជា ការស្វែងរកអដ្ឋិធាតុ ទាហានអាមេរិកបាត់ខ្លួន ក្នុងសម័យសង្គ្រាមនៅកម្ពុជា និងការបញ្ជូនជនជាតិខ្មែរ រស់នៅសហរដ្ឋអាមេរិក ត្រឡប់មកវិញផងដែរ»។

ក្នុងជំនួបនោះ លោក William Heidt បានលើកឡើងដែរថា ក្នុងរយៈពេលបំពេញការងារនៅកម្ពុជា លោកបានរៀនសូត្រជាច្រើន ហើយក៏បានឃើញពីការរីកចម្រើន នៅកម្ពុជាជាច្រើនផងដែរ។ មិនត្រឹមតែប៉ុណ្ណោះកន្លងមកនេះ លោកបានខិតខំជំរុញធ្វើយ៉ាងណា ឱ្យទីក្រុងវ៉ាស៊ីនតោនយល់ពីប្រទេសកម្ពុជាឲ្យបានច្រើន។ លោកបានបញ្ជាក់ថា រហូតមកដល់ពេលនេះ ទំនាក់ទំនងកម្ពុជា-សហរដ្ឋអាមេរិក មានការរីកចម្រើនជាច្រើន។

លោកនាយករដ្ឋមន្រ្តី ហ៊ុន សែន ក៏បានមើលឃើញពីវឌ្ឍនភាពនៃទំនាក់ទំនង និងកិច្ចសហប្រតិបត្តិការប្រទេសទាំងពីរផងដែរ។ លោកបានបន្តថា បើទោះបីមានការប្រឈម ឬមានចំណុចខ្លះ ដែលកន្លងមកមានខ្វែងមតិគ្នាក្តី ប៉ុន្តែមានការរីកចម្រើនជាច្រើន រវាងទំនាក់ទំនងកម្ពុជា និងសហរដ្ឋអាមេរិកនេះ។ លោកក៏បានបង្ហាញបំណងប្រាថ្នាចង់ឃើញប្រទេសទាំងពីរបន្តសន្ទនាគ្នា ធ្វើឱ្យប្រទេសទាំងពីរ បានយល់ពីគ្នា ធ្វើឱ្យទំនាក់ទំនងទ្វេរភាគីបន្តកើនឡើង។ ចុងក្រោយលោកបានបញ្ជាក់ប្រាប់ទូតអាមេរិកថា កម្ពុជាស្វាគមន៍អ្នកវិនិយោគ មកពីគ្រប់ប្រទេសទាំងអស់មិនថាតែចិន ឬអាមេរិកនោះទេ៕

អត្ថបទទាក់ទង