ក្រសួងបរទេសកម្ពុជា ជូនព័ត៌មានអំពី សម្តេចតេជោ ហ៊ុន សែន ដែលនឹងដឹកនាំគណៈប្រតិភូទៅចូលរួមកិច្ចប្រជុំកំពូលពិសេស អាស៊ាន អូស្ត្រាលី នៅថ្ងៃទី១៦ ដល់ថ្ងៃទី១៨ ខែមីនា ខាងមុខ
ក្រសួងបរទេសកម្ពុជា ជូនព័ត៌មានអំពី សម្តេចតេជោ ហ៊ុន សែន ដែលនឹងដឹកនាំគណៈប្រតិភូទៅចូលរួមកិច្ចប្រជុំកំពូលពិសេស អាស៊ាន អូស្ត្រាលី នៅថ្ងៃទី១៦ ដល់ថ្ងៃទី១៨ ខែមីនា ខាងមុខក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី១២ ខែមីនា ឆ្នាំ២០១៨នេះ បានចេញសេចក្តីប្រកាសព័ត៌មាន អំពីដំណើរទស្សនកិច្ចផ្លូវការរបស់ សម្តេចតេជោ ហ៊ុន សែន ដែលនឹងដឹកនាំគណៈប្រតិភូទៅចូលរួមកិច្ចប្រជុំកំពូលពិសេស អាស៊ាន អូស្ត្រាលី ដែលនឹងប្រព្រឹត្តទៅនៅថ្ងៃទី១៦ ដល់ថ្ងៃទី១៨ ខែមីនា ឆ្នាំ២០១៨ខាងមុខ តាមការអញ្ជើញរបស់ឯកឧត្តម ម៉ាល់កុម ធឺនប៊ុល ( Malcolm Turnbull) នាយករដ្ឋមន្ត្រីអូស្ត្រាលី។
សេចក្តីជូនព័ត៌មាន ក៏បានបញ្ជាក់ឱ្យដឹងដែរថា នៅក្នុងក្របខ័ណ្ឌនៃកិច្ចប្រជុំកំពូលពិសេសអាស៊ាន- អូស្ត្រាលី សម្តេចតេជោ រួមជាមួយថ្នាក់ដឹកនាំអាស៊ាន និងនាយករដ្ឋមន្ត្រីអូស្ត្រាលី នឹងអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងអាស៊ាន និងអូស្ត្រាលី ស្តីពីកិច្ចសហប្រតិបត្តិការប្រយុទ្ធប្រឆាំងភេរវកម្មអន្តរជាតិ និងកម្មវិធីបន្ទាប់ ថ្នាក់ដឹកនាំកម្ពុជា ក៏នឹងជួបដោយឡែកពីគ្នាជាមួយនិស្សិតអូស្ត្រាលីដែលកំពុង់សិក្សានៅប្រទេសសមាជិកអាស៊ាន ក្រោមផែនការកូឡុមបូថ្មី និងនិស្សិតប្រទេសសមាជិកអាស៊ាន ដេលកំពុងសិក្សានៅប្រទេសអូស្ត្រាលី តាមរយៈអាហាររូបករណ៍របស់អូស្ត្រាលីផងដែរ។
ក្រៅពីការអញ្ជើញចូលរួមកិច្ចប្រជុំកំពូល អាស៊ាន អូស្ត្រាលី សម្តេចតេជោនាយករដ្ឋមន្ត្រី នឹងជួបប្រជុំទ្វេភាគីជាមួយឯកឧត្តម ម៉ាល់កុម ធឺនប៊ុល នាយករដ្ឋមន្ត្រីអូស្រា្តលី អញ្ជើញចូលរួមពិសារអាហារពេលព្រឹកការងារជាមួយឯកឧត្តម ង្វៀន សួនហ៊្វុក នាយករដ្ឋមន្ត្រីវៀតណាម និងឯកឧត្តមបណ្ឌិត ថងលូន ស៊ីស៊ូលីត នាយករដ្ឋមមន្ត្រីប្រទេសឡាវ។
នៅក្នុងអំឡុងពេលស្នាក់នៅប្រទេសអូស្រ្តាលី សម្តេចតេជោ នឹងអញ្ជើញទស្សនាវិមានអូប៉េរ៉ាស៊ីដនី ទទួលជួបសហគមន៍ខ្មែរនៅអូស្ត្រាលី និងជួបជាមួយនិស្សិតកម្ពុជា និងអតីតនិស្សិតអូស្ត្រាលីផងដែរ។
សូមអានសេចក្តីជូនព័ត៌មានខាងក្រោមនេះ៖
