កីឡាករ កីឡាការិនី បង្ហាញការស្រលាញ់ស្មោះស្ម័គ្រគាំទ្រចំពោះការដឹកនាំរបស់ប្រមុខរាជរដ្ឋាភិបាល
កីឡាករ កីឡាការិនី បង្ហាញការស្រលាញ់ស្មោះស្ម័គ្រគាំទ្រចំពោះការដឹកនាំរបស់ប្រមុខរាជរដ្ឋាភិបាលនៅល្ងាចថ្ងៃទី៤ ខែមេសា ឆ្នាំ២០១៩ លោកនាយករដ្ឋមន្ត្រី ហ៊ុន សែន បានអញ្ជើញជួបជុំសំណេះសំណាល និងពិសារអាហារសាមគ្គីជាមួយបងប្អូនក្រុមកីឡាករ កីឡាការិនីកម្ពុជា ចំនួន ៤,០៩៦នាក់ នៅមជ្ឈមណ្ឌលកោះពេជ្រ។ កម្មវិធីដ៏មានអត្ថន័យនេះ គឺជាផ្នែកមួយដើម្បីលើកទឹកចិត្តកីឡាករ-កីឡាការិនី ក៏ដូចជាមន្ដ្រី និងគ្រូបង្វឹកដែលបានខិតខំយ៉ាងខ្លាំងនៅក្នុងវិស័យកីឡាកន្លងមក និងបានបង្ហាញការស្រឡាញ់ដោយស្មោះស្ម័គ្ររបស់កីឡាករកីឡាការិនីដែលពួកគាត់តែងតែទុកចិត្ត និងគាំទ្រ ១០០% ចំពោះការដឹកនាំរបស់ប្រមុខដឹកនាំរាជរដ្ឋាភិបាលកម្ពុជាផងដែរ។
លោកនាយករដ្ឋមន្ត្រី ហ៊ុន សែន ពិតជារីករាយខ្លាំងណាស់ដែលបានអញ្ជើញមកជួបបងប្អូនកីឡាករ កីឡាការិនីដោយផ្ទាល់ ជាលើកទី៤នៃឆ្នាំ២០១៩នេះ ដែលលោកគិតថា នេះគឺជាការជួបជុំមហាគ្រួសារនៃបងប្អូនកីឡាករកីឡាការិនីរបស់ប្រទេសកម្ពុជាយើង។
លោកនាយករដ្ឋមន្ត្រី ហ៊ុន សែន បានកោតសរសើរ និងបានថ្លែងអំណរគុណចំពោះថ្នាក់ដឹកនាំ គ្រូបង្វឹកហាត់ ជាពិសេស កីឡាករ កីឡាការិនី និងសហព័ន្ធកីឡាទាំងអស់ដែលបានរៀបចំអោយមានការជួបជុំជាលើកទី៤នេះ។ លោកនាយករដ្ឋមន្ត្រី បានកោតសរសើរ និងថ្លែងអំណរគុណផងដែរចំពោះថ្នាក់ដឹកនាំ គ្រូបង្ហាត់ ជាពិសេសកីឡាករ កីឡាការនីទាំងអស់ដែលបានចូលរួមចំណែកក្នុងការអភិវឌ្ឍវិស័យកីឡាអោយកាន់តែរីកចម្រើន។
ជាថ្មីម្តងទៀត លោក ហ៊ុន សែន បានប្រកាសពីពេលវេលាដែលកម្ពុជាត្រូវធ្វើម្ចាស់ប្រទេសរៀបចំកីឡា Sea Games នៅអំឡុងខែឧសភា ឆ្នាំ២០២៣ ហើយដែលឆ្នាំនោះ ក៏ជាឆ្នាំដែលកម្ពុជាយើងត្រូវរៀបចំបោះឆ្នោតជាតិផងដែរ។ ស្របជាមួយគ្នានោះ ជាពេលដែលកម្ពុជានឹងទទួលបានផ្លូវល្បឿនលឿនពីភ្នំពេញទៅខេត្តព្រះសីហនុ ដែលត្រូវសាងសង់រួចរាល់នៅ ខែមិថុនា ឆ្នាំ ២០២៣ ដែលយើងនឹងអាចប្រើប្រាស់សំរាប់ Sea Games ទៀតផង៕
