ខ្មែរប៉ុស្ដិ៍ Close

កិច្ចប្រជុំកំពូលពិសេសអាស៊ាន-អូស្រ្តាលីបានបើកជាផ្លូវការជាមួយការប្តេជ្ញាចិត្តខ្ពស់ក្នុងការពង្រឹងកិច្ចសហប្រតិបត្តិការ

ដោយ៖ សម ឬទ្ធិពល ​​ | ថ្ងៃសៅរ៍ ទី១៧ ខែមីនា ឆ្នាំ២០១៨ ផ្ទះហ្វេសប៊ុក 1839
កិច្ចប្រជុំកំពូលពិសេសអាស៊ាន-អូស្រ្តាលីបានបើកជាផ្លូវការជាមួយការប្តេជ្ញាចិត្តខ្ពស់ក្នុងការពង្រឹងកិច្ចសហប្រតិបត្តិការកិច្ចប្រជុំកំពូលពិសេសអាស៊ាន-អូស្រ្តាលីបានបើកជាផ្លូវការជាមួយការប្តេជ្ញាចិត្តខ្ពស់ក្នុងការពង្រឹងកិច្ចសហប្រតិបត្តិការ

ស៊ីដនី, អូស្ត្រាលី)៖ កិច្ចប្រជុំកំពូលពិសេសអាស៊ាន-អូស្រ្តាលី បានបើកជាផ្លូវការហើយនៅរសៀលថ្ងៃទី១៧ ខែមីនា ឆ្នាំ២០១៨នេះ នៅមជ្ឈមណ្ឌលសន្និសីទអន្តរជាតិស៊ីដនី ប្រទេសអូស្រ្តាលី។ មេដឹកនាំនៃប្រទេសអាស៊ាន ត្រូវបានធ្វើគារវកិច្ចស្វាគមន៍យ៉ាងស្និទ្ធស្នាលរាក់ទាក់បំផុតពីលោក ម៉ាល់ខូម ថើនប៊ុល (Malcolm Turnbull) នាយករដ្ឋមន្រ្តីអូស្រ្តាលី។

កិច្ចប្រជុំកំពូលពិសេសអាស៊ាន-អូស្រ្តាលី ឆ្នាំ២០១៨នេះ មានគោលបំណងពង្រឹងការរួមចំណែករបស់អាស៊ាន និងអូស្រ្តាលី ក្នុងការការលើកកម្ពស់សន្តិសុខ និងវិបុលភាពតំបន់ ព្រមទាំងដើម្បីឆ្លុះបញ្ចាំងពីការប្តេជ្ញាចិត្តពង្រឹងភាពជាដៃគូយុទ្ធសាស្រ្តរវាងអាស៊ាន-អូស្រ្តាលីឱ្យកាន់តែស៊ីជម្រៅ តាមរយៈការបន្តកិច្ចសហប្រតិបត្តិការក្នុងវិស័យសន្តិសុខនយោបាយ សេដ្ឋកិច្ច និងការតភ្ជាប់ សម្រាប់រយៈពេលប៉ុន្មានឆ្នាំទៅមុខទៀត។

កិច្ចប្រជុំព្រឹកមិញនេះ មេដឹកនាំអាស៊ាន-អូស្រ្តាលី បានអញ្ជើញជួបប្រាស្រ័យជាមួយអតីតនិស្សិតអូស្រ្តាលី ដែលបានសិក្សាក្នុងប្រទេសអាស៊ាន ក្រោមផែនការកូឡំបូថ្មី ៣នាក់ និងនិស្សិតនៃប្រទេសអាស៊ានកំពុងសិក្សាក្នុងប្រទេសអូស្រ្តាលីក្រោមអាហារូបករណ៍ចំនួន១នាក់។ នៅក្នុងកិច្ចប្រជុំកំពូលពិសេសនេះដែរ មេដឹកនាំអាស៊ាន-អូស្រ្តាលីបានអញ្ជើញជាអធិបតីនៃពិធីបិទសន្និសីទស្តីពីការប្រយុទ្ធប្រឆាំងអំពើភេរវកម្ម ដែលក្នុងនោះមេដឹកនាំអាស៊ាន-អូស្រ្តាលីបានឯកភាព និងចុះអនុស្សារណៈរវាងអាស៊ាន-អូស្រ្តាលី ស្តីពីកិច្ចសហប្រតិបត្តិការប្រយុទ្ធប្រឆាំងភេរវកម្ម។ អនុស្សារណៈនេះ នឹងនាំមកនូវលទ្ធផលចំពោះសេចក្តីថ្លែងការណ៍រួម សម្រាប់កិច្ចសហប្រតិបត្តិការប្រយុទ្ធប្រឆាំងអំពើភេរវកម្មអន្តរជាតិ ដែលបានឯកភាពគ្នាដោយថ្នាក់ដឹកនាំអាស៊ាន-អូស្រ្តាលី កាលពីខែកញ្ញាឆ្នាំ២០១៦។

មេដឹកនាំទាំងអស់បានចាត់ទុកថា កញ្ចប់គាំទ្រគំនិតផ្តួមផ្តើមដែលបានស្នើទ្បើងនេះ គឺស្របនឹងមូលបទរបស់សន្និសីទអាស៊ាន-អូស្រ្តាលី ស្តីពីការប្រយុទ្ធប្រឆាំងអំពើភេរវកម្ម ដែលនឹងប្រព្រឹត្តទៅនៅថ្ងៃទី១៦-១៧ ខែមីនា ឆ្នាំ២០១៨ ហើយនឹងគាំទ្រដល់កិច្ចខំប្រឹងប្រែងទ្វេភាគី តំបន់ និងពហុភាគី ដែលមានស្រាប់ដើម្បីលើកកម្ពស់កិច្ចសហប្រតិបត្តិការប្រយុទ្ធប្រឆាំងភេរវកម្ម និងអំពើហិង្សាជ្រុលនិយម។ អូស្រ្តាលីក៏នឹងផ្តល់ជំនួយបច្ចេកទេសដល់ដៃគូអាស៊ាន ដើម្បីតាក់តែង និងអនុវត្តច្បាប់ប្រឆាំងអំពើភេរវកម្ម ដែលស្របជាមួយស្តង់ដារអន្តរជាតិ និងឧត្តម្មានុវត្ត។ បង្កើតកិច្ចពិភាក្សា និងវេទិកាថ្នាក់តំបន់នានាជាមួយអាស៊ាន និងជាមួយដៃគូអនុវត្តច្បាប់អូស្ត្រាលី ក្នុងគោលបំណងប្រយុទ្ធប្រឆាំង ការគំរាមគំហែងភេរវកម្មពាក់ព័ន្ធ និងក្រុមអាយស៊ីល (ISIL-affiliated terrorists)។

ចំពោះមុខមេដឹកនាំអាស៊ាន នាយករដ្ឋមន្រ្តីអូស្រ្តាលី បានធ្វើការគូសបញ្ជាក់ដែរថា អូស្រ្តាលីនឹងផ្តល់កម្មវិធីកសាងសមត្ថភាពដល់ដៃគូអនុវត្តច្បាប់អាស៊ាន លើបច្ចេកវិទ្យាទប់ទល់ឧក្រិដ្ឋកម្ម ដើម្បីជួយក្នុងការស្រាវជ្រាវ និងកាត់ផ្តាច់សកម្មភាពភេរវកម្ម។ ការរៀបចំសិក្ខាសាលាអាស៊ាន-អូស្ត្រាលី ស្តីពីការប្រើប្រាស់ភស្តុតាងអេឡិចត្រូនិចក្នុងភេរវកម្ម និងការស៊ើបអង្កេតឧក្រិដ្ឋកម្មឆ្លងដែន និងការចោទប្រកាន់។ ការរៀបចំសិក្ខាសាលាអាស៊ាន-អូស្រ្តាលី ស្តីពីការប្រយុទ្ធប្រឆាំងភេរវកម្ម និងក្រុមអ្នកប្រយុទ្ធបរទេស ដើម្បីសន្តិសុខតាមព្រំដែន (អន្តោប្រវេសន៍ គយ ការអនុវត្តន៍ច្បាប់ និងស៊ើបការណ៍)។ ជាមួយគ្នានេះ អូស្រ្តាលី នឹងផ្តល់វគ្គបណ្តុះបណ្តាលដល់អ្នកវិភាគស៊ើបការណ៍ផ្នែកហិរញ្ញវត្ថុថ្នាក់តំបន់ចំនួន៤វគ្គ ដល់ប្រទេសសមាជិកអាស៊ាន ដើម្បីជួយសម្រួលដល់ការធ្វើសមាហរណកម្មបន្ថែមទៀត ក្នុងការផ្លាស់ប្តូរការស៊ើបការណ៍ពហុភាគី និងដំណើរការកិច្ចសហប្រតិបត្តិការប្រយុទ្ធប្រឆាំងនឹងការផ្តល់ហិរញ្ញវត្ថុភេរវកម្ម និងបង្កើតកម្មវិធីផ្លាស់ប្តូរអ្នកវិភាគពហុភាគីអាស៊ាន-អូស្រ្តាលី សម្រាប់អ្នកវិភាគស៊ើបការណ៍ ផ្នែកហិរញ្ញវត្ថុ។

ដើម្បីគាំទ្រកិច្ចប្រជុំកំពូលពិសេសនេះ អូស្រ្តាលីនឹងធ្វើជាម្ចាស់ផ្ទះ និងរៀបចំការប្រកួតសរសេរកម្មវិធីកុំព្យូទ័រ ដើម្បីធ្វើឱ្យស៊ីជម្រៅកិច្ចសហការរវាងអង្គភាពស៊ើបការណ៍ហិរញ្ញវត្ថុ ធនាគារ អ្នកអភិវឌ្ឍ និងដៃគូដទៃទៀតក្នុងតំបន់ ដើម្បីប្រយុទ្ធប្រឆាំងការផ្តល់ហិរញ្ញវត្ថុភេរវកម្ម និងពង្រឹងសន្តិសុខតាមប្រព័ន្ធអ៊ីនធើណេត។ គាំទ្រការពង្រីកបណ្តាញអាស៊ីអាគ្នេយ៍នៃអង្គការសង្គមស៊ីវិល ដើម្បីប្រឆាំងអំពើហិង្សាជ្រុលនិយម ដោយរៀបចំកិច្ចប្រជុំស្តីពីអង្គការសង្គមស៊ីវិល ដើម្បីឯកភាពលើយុទ្ធសាស្ត្រ និងវិស័យអាទិភាពសម្រាប់ការភ្ជាប់ទំនាក់ទំនង។ នៅក្នុងពិធីនោះដែរ មេដឹកនាំអាស៊ាន-អូស្រ្តាលី នឹងរៀបចំពិធីចុះហត្ថលេខាលើអនុស្សារណៈរវាងអាស៊ាន-អូស្រ្តាលី ស្តីពីកិច្ចសហប្រតិបត្តិការប្រយុទ្ធប្រឆាំងភេរវកម្ម ដែលចុះហត្ថលេខាដោយរដ្ឋមន្រ្តីការបរទេសអូស្រ្តាលី ជាមួយអគ្គលេខាធិការអាស៊ានផងដែរ។

គួរបញ្ជាក់ថា ទំនាក់ទំនងអាស៊ាន-អូស្រ្តាលី បានចាប់ផ្តើមឡើង ក្នុងភាពជាដៃគូសន្ទនាដំបូងគេបង្អស់នៅឆ្នាំ១៩៧៤ ដោយមានសារៈសំខាន់យ៉ាងខ្លាំងសម្រាប់សន្តិសុខ និងវិបុលភាពក្នុងតំបន់។ ដោយមើលឃើញពីសារៈសំខាន់ នៃភាពចាំបាច់នៅក្នុងការថែរក្សាផលប្រយោជន៍ស្នូលផ្នែកសេដ្ឋកិច្ច សន្តិសុខ និងការដោះស្រាយបញ្ហាប្រឈមរួមគ្នា ទំនាក់ទំនងភាពជាដៃគូសន្ទនាអាស៊ាន-អូស្រ្តាលី បានឯកភាពឈានទៅដល់ភាពជាដៃគូយុទ្ធសាស្រ្តនៅក្នុងឆ្នាំ២០១៤។ នៅឆ្នាំ២០១៥ អាស៊ាន-អូស្រ្តាលី បានឯកភាពគ្នាក្នុងការរៀបចំឱ្យមានកិច្ចប្រជុំកំពូលអាស៊ាន-អូស្រ្តាលី រៀងរាល់២ឆ្នាំម្តង ក្នុងនោះនៅឆ្នាំ២០១៦ បានចេញសេដ្ឋកិច្ចថ្លែងការណ៍រួមមួយស្តីពីកិច្ចប្រជុំកំពូលអាស៊ាន-អូស្រ្តាលី ជារៀងរាល់២ឆ្នាំម្តងក្នុងឱកាសនៃកិច្ចប្រជុំកំពូលអាស៊ានលើកទី២៨-២៩ នៅទីក្រុងវៀងច័ន្ទ ប្រទេសឡាវ។ ចាប់តាំងពីបានក្លាយជាដៃគូសន្ទនាអស់រយៈពេល៤៤ឆ្នាំមក នេះគឺជាលើកទី១ហើយ ដែលអូស្រ្តាលីបានធ្វើជាម្ចាស់ផ្ទះ ក្នុងការរៀបចំកិច្ចប្រជុំកំពូលអាស៊ាន-អូស្រ្តាលី នៅលើទឹកដីរបស់ខ្លួន។

ប្រធានបទសំខាន់ៗមួយចំនួនត្រូវបានលើកយកមកពិភាក្សា នៅក្នុងកិច្ចប្រជុំកំពូលពិសេសនេះ គឺការផ្តោតសំខាន់ទៅលើទិសដៅអនាគតនៃទំនាក់ទំនងដៃគូសន្ទនាអាស៊ាន-អូស្រ្តាលី និងសារៈសំខាន់នៃការបង្កើនកិច្ចសហប្រតិបត្តិការ នៅក្នុងវិស័យយុទ្ធសាស្រ្តមួយចំនួន ក្នុងគោលបំណងរក្សាសន្តិភាព សន្តិសុខ និងស្ថេរភាព ពោលគឺកិច្ចប្រជុំកំពូលនៅពេលនេះ បានផ្តល់អាទិភាពពិភាក្សាលើរបៀបវារៈសំខាន់ចំនួនពីរ គឺការប្រយុទ្ធប្រឆាំងនិងអំពើភេរវកម្ម និងការធ្វើពាណិជ្ជកម្ម-វិនិយោគ។

សូមបញ្ជាក់ដែរថា អាស៊ានគឺជាដៃគូពាណិជ្ជកម្មមួយក្នុងចំណោមដៃគូពាណិជ្ជកម្មកំពូលទាំងបី របស់អូស្រ្តាលី ដែលតំណាងឱ្យប្រមាណ ១៥% នៃពាណិជ្ជកម្មសរុបរបស់អូស្រ្តាលី។ ការវិនិយោគផ្ទាល់របស់អូស្រ្តាលី ក្នុងប្រទេសអាស៊ាន នៅចុងឆ្នាំ២០១៦ មានចំនួន៣៨ប៊ីលានដុល្លារ។ ជាមួយគ្នានេះអូស្រ្តាលីបាន ស្វាគមន៍ភ្ញៀវទេសចរណ៍ជាង១លាននាក់ ពីប្រទេសអាស៊ានជារៀងរាល់ឆ្នាំ ហើយនៅឆ្នាំ២០១៦-២០១៧ ជនជាតិអូស្រ្តាលីជាង៣លាននាក់ បានធ្វើដំណើរទៅកាន់ប្រទេសអាស៊ាន។ ទន្ទឹមនឹងនេះមាននិស្សិតប្រមាណ១សែននាក់ ពីប្រទេសអាស៊ាន កំពុងសិក្សាក្នុងប្រទេសអូស្រ្តាលី៕

 

អត្ថបទទាក់ទង