ទស្សនៈមិត្តអ្នកអាន៖ វិធានការច្បាប់នឹងត្រូវអនុវត្តយ៉ាងម៉ឹងម៉ាត់បំផុតចំពោះជន ឬក្រុមប៉ុនប៉ងបំផ្លាញសន្តិភាព!
ទស្សនៈមិត្តអ្នកអាន៖ វិធានការច្បាប់នឹងត្រូវអនុវត្តយ៉ាងម៉ឹងម៉ាត់បំផុតចំពោះជន ឬក្រុមប៉ុនប៉ងបំផ្លាញសន្តិភាព!មន្ត្រីអង្គការសង្គមស៊ីវិលក្រៅរដ្ឋាភិបាលលើកឡើងថា រដ្ឋាភិបាលកម្ពុជា បានរឹតត្បិតសិទ្ធិសេរីភាពធ្វើនយោ បាយរបស់ប្រជាពលរដ្ឋ ដោយចាត់ទុកថា រដ្ឋាភិបាលធ្វើទុក្ខបុកម្នេញសកម្មជន និងអ្នកគាំទ្រអតីតគណបក្សប្រឆាំងដែលត្រូវបានតុលាការរំលាយចោលទៅហើយនោះ។ តើសកម្មជន និងអ្នកគាំទ្រអតីតបក្សប្រឆាំង បានធ្វើសកម្មភាពអ្វីខ្លះ ទើបបានជាអាជ្ញាធរមូលដ្ឋាន ត្រូវតែចាត់វិធានការច្បាប់យ៉ាងតឹងរ៉ឹងដោយគ្មានការយោគយល់ ដែលអង្គការសង្គមស៊ីវិលហៅថា ជាការរឹតត្បិតសិទ្ធិសេរីភាពនយោបាយរបស់ប្រជាពលរដ្ឋនោះ?
ជាអ្នកតាមដាននយោបាយ និងសង្គមម្នាក់ ខ្ញុំមិនយល់ស្របនឹងការលើកឡើងរបស់មន្ត្រីអង្គការក្រៅរដ្ឋាភិបាលទាំងនោះទេ ក៏ប៉ុន្តែខ្ញុំយល់ស្របថា អ្វីដែលជាការលើកឡើងរបស់មន្ត្រីអង្គការក្រៅរដ្ឋាភិបាលដែលមាននិន្នាការនយោបាយនោះ គ្រាន់តែជាការកេងចំណេញរូបភាពនយោបាយឲ្យក្រុមប្រឆាំងប៉ុណ្ណោះ ដើម្បីបំពេញចិត្តបរទេសជាម្ចាស់ជំនួយ ដែលអាចនិយាយបានថា ជាម៉ែឪរបស់ក្រុមប្រឆាំងផងដែរ។
គួរដឹងថា អតីតបក្សប្រឆាំងត្រូវបានតុលាការកំពូលកាលពីថ្ងៃទី១៦ ខែវិច្ឆិកា ឆ្នាំ២០១៧ បានសម្រេចរំលាយដោយបិទផ្លូវតវ៉ា និងហាមធ្វើសកម្មភាពនយោបាយរយៈពេល ៥ឆ្នាំ របស់ថ្នាក់ដឹកនាំគណបក្សនេះចំនួន ១១៨រូប ក្នុងសំណុំរឿងក្បត់ជាតិរបស់លោក កឹម សុខា អតីតប្រធានបក្សប្រឆាំង ស្របតាមច្បាប់ស្តីពីគណបក្សនយោបាយ។ ដូច្នេះ រាល់ការធ្វើសកម្មភាពនយោបាយរបស់បុគ្គលគ្រប់រូប រួមទាំងសកម្មជនអតីតបក្សប្រឆាំងផង ទាក់ទងនឹងអតីតគណបក្សប្រឆាំង ដែលតុលាការកំពូលបានហាមឃាត់ គឺជាអំពើបំពានច្បាប់។
តើសកម្មជនអតីតបក្សប្រឆាំង បច្ចុប្បន្នធ្វើសកម្មភាពក្នុងនាមគណបក្សនយោបាយណាមួយនៅក្នុងព្រះរាជាណាចក្រកម្ពុជា? បើធ្វើសកម្មភាពបម្រើឲ្យអតីតបក្សប្រឆាំង ដែលតុលាការរំលាយចោលទៅហើយនោះ គឺជាអំពើល្មើសច្បាប់ ប្រឆាំងនឹងសាលដីការបស់តុលាការកំពូល និងជាចេតនាប៉ុនប៉ងផ្តួលរំលំរដ្ឋាភិបាល តាមការញុះញង់របស់ទណ្ឌិត សម រង្ស៊ី មេឧទ្ទាមចលនាប្រឆាំងក្រៅច្បាប់ ដែលកំណត់ថ្ងៃវិលចូលស្រុក ធ្វើបដិវត្តន៍ពណ៌ជាថ្មីទៀតនៅថ្ងៃទី៩វិច្ឆិកាខាងមុខ ក្រោយបរាជ័យយ៉ាងអាម៉ាស់កាលពីឆ្នាំ២០១៣។
គួរកត់សម្គាល់ថា លោក សម រង្ស៊ី មេចលនាឧទ្ទាមប្រឆាំងក្រៅច្បាប់ បានអំពាវនាវឲ្យប្រជាពលរដ្ឋងើបឡើងបះបោរផ្តួលរំលំរដ្ឋាភិបាលស្របច្បាប់ដែលកើតចេញពីការបោះឆ្នោត។ បើតាមព័ត៌មានបែកធ្លាយ គឺលោក សម រង្ស៊ី បានជួលសកម្មជនស្ម័គ្រស្លាប់ក្នុងមួយខេត្ត ១០០នាក់ និងផ្តល់ប្រាក់ ១ម៉ឺនដុល្លារ ដើម្បីបង្កភាពវឹកវរ ចលាចលសង្គម ក្នុងថ្ងៃទី៩វិច្ឆិកាខាងមុខ ដែលទណ្ឌិតរូបនេះកំណត់ពេលវិលចូលស្រុកវិញ។ ក៏ប៉ុន្តែអ្វីដែលច្បាស់នោះ គឺទណ្ឌិតរូបនេះ នឹងគ្មានភាពក្លាហានហ៊ានវិលចូលស្រុកវិញទេ អ្វីដែលជាបញ្ហា គឺប្រសិនបើបំណងរបស់ទណ្ឌិត សម រង្ស៊ី ធ្វើបានសម្រេចមែន នោះប្រទេសជាតិ នឹងមានភាពវឹកវរ ចលាចល អសន្តិសុខសង្គម ជាមិនខានឡើយ។ ហេតុដូច្នេះហើយ បានជាអាជ្ញាធរមានសមត្ថកិច្ច ត្រូវតែចាត់វិធានការច្បាប់តឹងរឹងបំផុតចំពោះបុគ្គល ឬក្រុមណាមួយ ដែលប៉ុនប៉ងចង់បំផ្លាញ សុខសន្តិភាព ស្ថិរភាពនយោបាយ និងការអភិវឌ្ឍ ដែលរាជរដ្ឋាភិបាលរកបានដោយលំបាកជាទីបំផុតនេះ។
ការធ្វើសកម្មភាពនយោបាយរបស់សកម្មជនអតីតបក្សប្រឆាំង ត្បិតថា ជាសិទ្ធិសេរីភាពរបស់បុគ្គលគ្រប់រូប ដែលមានចែងក្នុងរដ្ឋធម្មនុញ្ញព្រះរាជាណាចក្រកម្ពុជា ដែលជាច្បាប់កំពូលរបស់ជាតិក៏ពិតមែន ក៏ប៉ុន្តែ វាជាសកម្មភាពបំពាននឹងច្បាប់។ បំពានច្បាប់ គឺពួកគេទៅទទួលយកផែនការរបស់បរទេសតាមរយៈទណ្ឌិត សម រង្ស៊ី បំផុសបំផុលឲ្យមានការប្រមូលផ្តុំជួបជុំ ដើម្បីបង្កភាពវឹកវរ ចលាចល នៅថ្ងៃទី៩វិច្ឆិកាខាងមុខ។ គួរដឹងថា ការទទួលយកផែនការរបស់ទណ្ឌិត សម រង្ស៊ី មកអនុវត្ត គឺជាសកម្មភាពគាំទ្រ និងបង្កើតឲ្យមានបដិវត្តន៍ពណ៌ជាថ្មីទៀតនៅកម្ពុជាដើម្បីផ្តួលរំលំរាជរដ្ឋាភិបាលស្របច្បាប់ដែលកើតចេញពីការបោះឆ្នោតតាមបែបមិនប្រជាធិបតេយ្យនេះ គឺមិនមែនជាអ្វី ដែលជាសេចក្តីប៉ងប្រាថ្នារបស់ប្រជាពលរដ្ឋកម្ពុជា កំពុងរស់នៅក្នុងសុខសន្តិភាពនោះឡើយ។ ផ្ទុយទៅវិញ ប្រជាពលរដ្ឋមានតែជំរុញឲ្យរាជរដ្ឋាភិបាលចាត់វិធានការម៉ឺងម៉ាត់ថែមទៀត ដើម្បីបង្ការភាពអន្តិសុខផ្សេងៗដែលបង្កឡើងដោយក្រុមប្រឆាំង។
យ៉ាងណាមិញ បើនិយាយថា រដ្ឋាភិបាលរឹតត្បិតសេរីភាពរបស់ប្រជាពលរដ្ឋក្នុងការធ្វើសកម្មភាពនយោបាយ គឺខុសស្រឡះតែម្តង ពីព្រោះថា នៅកម្ពុជាមានគណបក្សនយោបាយចំនួន២០ បានចូលរួមក្នុងការបោះឆ្នោតជ្រើសតាំងតំណាងរាស្ត្រអាណត្តិទី៦ កាលពីឆ្នាំ២០១៨ ហើយបច្ចុប្បន្នបាននិងកំពុងធ្វើសកម្មភាពយ៉ាងទូលាយនៅតាមមូលដ្ឋាននានាទូទាំងព្រះរាជាណាចក្រកម្ពុជា មានដូចជា គណបក្សយុវជនកម្ពុជា គណបក្សខ្មែរក្រោក គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ ជាដើម។ល។
គណបក្សច្រើនលើសលប់បានសម្រេចចិត្តចូលរួមក្នុងឧត្តមក្រុមប្រឹក្សាពិគ្រោះ និងផ្តល់យោបល់ ដើម្បីរួមចំណែកកសាង និងអភិវឌ្ឍន៍ប្រទេស ឲ្យកាន់តែរីកចម្រើនទៅមុខទៀត ក្នុងន័យថា ជាភ្នែក ច្រមុះ មើលពីចំណុចអសកម្ម ចំណុចអវិជ្ជមានរបស់មន្ត្រីអនុវត្តច្បាប់។ បើដូចមន្ត្រីអង្គការសង្គមស៊ីវិលក្រៅរដ្ឋាភិបាលនិយាយថា កម្ពុជារឹតត្បិតសេរីភាពពលរដ្ឋក្នុងការធ្វើនយោបាយ ម្ល៉េះសមពួកគេទាំងអស់នោះ មិនអាចធ្វើសកម្មភាពនយោបាយបានទេ ក៏ប៉ុន្តែផ្ទុយទៅវិញ ពួកគេទាំងអស់នោះ មានសិទ្ធិកោះហៅមន្ត្រី រហូតដល់រដ្ឋមន្ត្រីតាមក្រសួងនីមួយៗទៅឆ្លើយបំភ្លឺពីចម្ងល់របស់ពួកគេថែមទៀតផង៕
ដោយ៖ សុខ សុវណ្ណ
