ឯកអគ្គរដ្ឋទូតសហភាពអឺរ៉ុប៖ សហភាពអឺរ៉ុប នឹងបន្តធ្វើជាដៃគូដ៏ល្អជាមួយកម្ពុជា
ឯកអគ្គរដ្ឋទូតសហភាពអឺរ៉ុប៖ សហភាពអឺរ៉ុប នឹងបន្តធ្វើជាដៃគូដ៏ល្អជាមួយកម្ពុជាលោកស្រី កាមែន ម៉ូរីណូ (Carmen Moreno) ឯកអគ្គរដ្ឋទូតថ្មីរបស់សហភាពអឺរ៉ុបប្រចាំនៅកម្ពុជា បានថ្លែងអះអាងថា សហភាពអឺរ៉ុប នឹងបន្តធ្វើជាដៃគូដ៏ល្អជាមួយកម្ពុជា ដើម្បីជួយដល់ការអភិវឌ្ឍផ្នែកសេដ្ឋកិច្ចរបស់កម្ពុជាប្រកបដោយចេរភាព។ ការបញ្ជាក់របស់លោកស្រី បានធ្វើឡើងក្នុងពេលអញ្ជើញជួបសម្តែងការគួរសម និងពិភាក្សាការងារជាមួយលោកនាយករដ្ឋមន្ត្រី ហ៊ុន សែន នាព្រឹកថ្ងៃទី០២ ខែធ្នូ ឆ្នាំ២០១៩នេះ នៅវិមានសន្តិភាព។
លោក អ៊ាង សុផល្លែត ជំនួយការផ្ទាល់របស់លោកនាយករដ្ឋមន្ត្រី បានប្រាប់ឱ្យដឹងថា នៅក្នុងជំនួបនេះ លោកស្រីឯកអគ្គរដ្ឋទូត បានសំដែងការភ្ញាក់ផ្អើល និងអបអរសាទរយ៉ាងខ្លាំង ចំពោះការអភិវឌ្ឍរបស់កម្ពុជា។ លោកបានលើកឡើងថា កម្ពុជា មានការអភិវឌ្ឍ និងកំពុងដើរលើផ្លូវត្រូវក្នុងការជំរុញការអភិវឌ្ឍ ប្រកបដោយចីរភាព លើបញ្ហាប្រែប្រួលអាកាសធាតុ ការថែរក្សាគ្រប់គ្រង ធនធានធម្មជាតិ និងការអភិវឌ្ឍពាណិជ្ជកម្មប្រកបដោយចីរភាពជាដើម។
លោកស្រី បានលើកឡើងទៀតថា សមិទ្ធផលដែលកម្ពុជាកំពុងមាននេះ គឺទទួលបានមកពីសុខសន្តិភាព និងស្ថេរភាព។ សុខសន្តិភាព ស្ថេរភាពនេះ គឺជាមូលដ្ឋានចាំបាច់សម្រាប់អនាគតកម្ពុជា សម្រាប់ការអភិវឌ្ឍប្រកបដោយចីរភាព ក៏ដូចជាសម្រាប់យុវជនជំនាន់ក្រោយរបស់កម្ពុជាផងដែរ។
លោកស្រី បានសង្កត់ធ្ងន់ថា លោកស្រីពិតជាមានមោទនភាពក្នុងការបន្តជាដៃគូរបស់កម្ពុជា ដើម្បីគាំទ្រដល់ការអភិវឌ្ឍកម្ពុជាប្រកបដោយចីរភាព។
ជាការឆ្លើយតបលោកនាយករដ្ឋមន្ត្រី ហ៊ុន សែន បានសម្តែងនូវការអបអរសាទរ ជូនចំពោះលោកស្រីឯកអគ្គរដ្ឋទូត ដែលត្រូវបានតែងតាំងជាអគ្គរដ្ឋទូតសហភាពអឺរ៉ុប ប្រចាំនៅកម្ពុជា។ លោកនាយករដ្ឋមន្ត្រី ក៏បានថ្លែងអំណរគុណនូវអ្វីដែលលោកស្រីបានលើកឡើង។ លោកនាយករដ្ឋមន្ត្រី បានគូសបញ្ជាក់ថា អ្វីដែលលោកស្រីបានលើកឡើង គឺជាមូលដ្ឋានមួយ ដែលកម្ពុជា និងសហភាពអឺរុប អាចបន្តធ្វើការរួមគ្នា ពង្រឹងទំនាក់ទំនងជាមួយគ្នា។
លោកនាយករដ្ឋមន្ត្រី ហ៊ុន សែន បានថ្លែងអំណរគុណសហភាពអឺរ៉ុប ដែលបានជួយកម្ពុជា ជាពិសេសក្នុងការកាត់ទោសអតីតថ្នាក់ដឹកនាំកំពូលៗខ្មែរក្រហម។ លោកនាយករដ្ឋមន្ត្រី បានស្នើទៅលោកស្រីឯកអគ្គរដ្ឋទូត ពិចារណាប្រើមូលដ្ឋាន ដែលបានសហការគ្នាកន្លងមកបន្តទៅទៀត ដើម្បីស្វែងរកនូវអ្វី ដែលអាចធ្វើការរួមគ្នាបន្តទៀត ក្នុងន័យជាដៃគូផង និងពង្រឹងពង្រីកទំនាក់ទំនង រវាងសហគមន៍អឺរ៉ុប និងកម្ពុជាផង៕
