ស្ថានទូតចិន ប្រគល់ថ្នាំបាញ់ចំនួន២០ធុង និងឧបករណ៍៤០គ្រឿង សម្រាប់បាញ់សម្លាប់មេរោគលើយន្តហោះ ជូនរដ្ឋលេខាធិការដ្ឋានអាកាសចរណ៍ស៊ីវិល
ស្ថានទូតចិន ប្រគល់ថ្នាំបាញ់ចំនួន២០ធុង និងឧបករណ៍៤០គ្រឿង សម្រាប់បាញ់សម្លាប់មេរោគលើយន្តហោះ ជូនរដ្ឋលេខាធិការដ្ឋានអាកាសចរណ៍ស៊ីវិលស្ថានទូតនៃសាធារណរដ្ឋប្រជាមានិតចិនប្រចាំនៅកម្ពុជា បានប្រគល់ថ្នាំបាញ់ចំនួន២០ធុង និងឧបករណ៍បាញ់ថ្នាំចំនួន៤០គ្រឿង សម្រាប់បាញ់សម្លាប់មេរោគលើយន្តហោះ ជូនរដ្ឋលេខាធិការដ្ឋានអាកាសចរណ៍ស៊ីវិល ដើម្បីទប់ស្កាត់ និងការពារ ការរាលដាលមេរោគCOVID-19 លើវិស័យអាកាសចរណ៍ស៊ីវិលនៅកម្ពុជា។ នេះបើយោងតាមការផ្សាយរបស់រដ្ឋលេខាធិការដ្ឋានអាកាសចរណ៍ស៊ីវិល។
ក្នុងពិធីប្រគល់ និងទទួលថ្នាំបាញ់ចំនួន២០ធុង និងឧបករណ៍៤០គ្រឿង សម្រាប់បាញ់សម្លាប់មេរោគលើយន្តហោះ ជូនរដ្ឋលេខាធិការដ្ឋានអាកាសចរណ៍ស៊ីវិល កាលពីព្រឹកថ្ងៃអង្គារ ៨ កើត ខែចេត្រ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី៣១ ខែមីនា ឆ្នាំ២០២០ ឯកឧត្ដម នាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្រ្តី ទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិលបានមានប្រសាសន៍ថា ថ្នាំបាញ់ចំនួន២០ធុង និងឧបករណ៍៤០គ្រឿង គឺពិតជាមានសារៈសំខាន់ណាស់ សម្រាប់បាញ់លើយន្តហោះពិសេស ( VVIP Flight) ជាព្រះទីនាំងនៃ ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំកំពូលៗនៃរាជរដ្ឋាភិបាលកម្ពុជា សម្រាប់បាញ់លើក្រុមហ៊ុនអាកាសចរណ៍កម្ពុជាដែលត្រូវការចាំបាច់។ ជាមួយគ្នានេះ ឯកឧត្ដមបណ្ឌិតក៏បានជូនលិខិតថ្លែងអំណរគុណដល់ ឯកឧត្តម Wang Wentian ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា ដែលបានផ្តល់នូវឧបករណ៍ សម្ភារ និង ថ្នាំសម្លាប់មេរោគខាងលើ ដែលរដ្ឋលេខាធិការដ្ឋានអាកាសចរណ៍ស៊ីវិល កំពុងត្រូវការជាចាំបាច់។ ឯកឧត្ដមបណ្ឌិតបានគូសបញ្ជាក់បន្ថែមថា នេះជានិមិត្តរូបនៃកិច្ចសហប្រតិបត្តិការគ្រប់វិស័យ ក្រោមពាក្យស្លោក «មិត្តភាពដែកថែប កម្ពុជា-ចិន» ដើម្បីទប់ស្កាត់ និងការពារ ការរាលដាលមេរោគCOVID-19។ ឯកឧត្ដមបានលើកឡើងថា ការទប់ស្កាត់មេរោគCOVID-19នេះ រដ្ឋលេខាធិការដ្ឋានអាកាសចរណ៍ស៊ីវិល កំពុងអនុវត្តន៍នូវវិធានការ វាស់កំដៅយ៉ាងតឹងរឹងគ្រប់មន្ត្រីថ្នាក់ដឹកនាំ និងភ្ញៀវជាតិ អន្តរជាតិ ទាំងអស់ពេលចូលធ្វើការ និងមកដល់ក៏បានបាញ់ថ្នាំសម្លាប់មេរោគ ក្នុងបរិវេណ អគារធ្វើការ និងគ្រប់នាយកដ្ឋាន ព្រមទាំងការិយាល័យធ្វើការទាំងអស់ ក្នុងគោលបំណង ទប់ស្កាត់ និងការពារ ការរាលដាលមេរោគCOVID-19 ដែលជាសត្រូវមើលមិនឃើញ។ ទន្ទឹមនេះ ចំពោះមន្ត្រីដែលបញ្ចប់បេសកម្មក្រៅប្រទេស ពេលមកដល់នឹងតម្រូវឱ្យនៅដាច់ដោយឡែក និងនៅគេហដ្ឋានចំនួន១៤ ថ្ងៃសិនមុនចាប់ផ្តើមធ្វើការ។
គូរបញ្ជាក់ផងដែរថា ការផ្តល់សម្ភាររបស់ស្ថានទូតចិនជូនដល់រដ្ឋលេខាធិការដ្ឋានអាកាសចរណ៍ស៊ីវិលនេះ គឺជាការឆ្លើយតបតាមការសន្យារបស់ លោកស្រី Zuo Wenxing អនុប្រធានស្ថានបេសកកម្ម និងជាទីប្រឹក្សា នយោបាយ (Deputy Chief of Mission and Political Counselor of the Chinese Embassy) ប្រចាំស្ថានទូតចិននៅកម្ពុជា ដែលបានសន្យាផ្តល់ នូវឧបករណ៍ សម្ភារ និងថ្នាំសម្លាប់មេរោគ ក្នុងឱកាសជំនួបពិភាក្សារការងារជាមួយ ឯកឧត្ដម នាយឧត្តមសេនីយ៍ បណ្ឌិត ម៉ៅ ហាវណ្ណាល់ កាលពីថ្ងៃទី ១១ ខែមីនា ឆ្នាំ២០២០ កន្លងទៅ៕
