ខ្មែរប៉ុស្ដិ៍ Close

ប្រទេសម៉ាឡេស៊ី ទិញសណ្តែកដីពីកម្ពុជាជាច្រើនតោន ក្នុងរយៈពេល ៤ខែកន្លងមកនេះ

ដោយ៖ សន ប្រាថ្នា ​​ | ថ្ងៃចន្ទ ទី៤ ខែឧសភា ឆ្នាំ២០២០ ព័ត៌មានទូទៅ 2255
ប្រទេសម៉ាឡេស៊ី ទិញសណ្តែកដីពីកម្ពុជាជាច្រើនតោន ក្នុងរយៈពេល ៤ខែកន្លងមកនេះប្រទេសម៉ាឡេស៊ី ទិញសណ្តែកដីពីកម្ពុជាជាច្រើនតោន ក្នុងរយៈពេល ៤ខែកន្លងមកនេះ

ប្រទេសម៉ាឡេស៊ី ដែលគេដឹងថា ជាប្រទេសមួយនៅក្នុងតំបន់អាស៊ាន បានទទួលទិញផលិត ផលសណ្តែកដីពីកម្ពុជា។

យោងទៅតាមសេចក្តីរាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នៅក្នុងរយៈពេល ៤ខែដើមឆ្នាំ ពោលគឺពីខែមករា ដល់ខែមេសា ឆ្នាំ២០២០ ប្រទេសម៉ាឡេស៊ី បានទទួលទិញសណ្តែកដីពីកម្ពុជានៅក្នុងបរិមាណប្រមាណជា ៣២,៦៤ តោន ។
ប្រភពដដែលនេះមិនបានលម្អិតអំពីតម្លៃ នៃការនាំចេញនោះទេ ប៉ុន្តែទោះបីជាយ៉ាងណាក៏ដោយ ដំណាំសណ្តែកដី ត្រូវបានកត់ត្រានៅក្នុងបញ្ជីនាំចេញរបស់កម្ពុជាទៅកាន់ទីផ្សារអន្តរជាតិ ។

កន្លងមកសណ្តែកដី គឺជាដំណាំដែលកសិករកម្ពុជាដាំសម្រាប់តែការផ្គត់ផ្គងនៅក្នុងស្រុក និងការដោះដូរក្រៅប្រព័ន្ធជាមួយនឹងប្រទេសជិតខាងតែប៉ុណ្ណោះ។ ការដោះដូរផលិតផលសណ្តែកដី គឺកន្លងមក បានប្រពឹត្តទៅតាមរយៈឈ្មួញកណ្តាល ហើយនាំចេញទៅវៀតណាម ទៅថៃ ជាដើម។

ដំណាំសណ្តែកដី ត្រូវបានគេដឹងថា គឺជាដំណាំដែលកសិករកម្ពុជាតែងតែដាំ សឹងតែគ្រប់ តំបន់នៅទូទាំងប្រទេស ។ ដីដែលអាចដាំដុះដំណាំសណ្តែកដីនេះបាន គឺជាប្រភេទល្បាយខ្សាច់ពោលគឺជាដីមានសភាពធូរ។ ជាទូទៅដំណាំប្រភេទនេះ កសិករកម្ពុជាតែងតែដាំមុនចូលឆ្នាំខ្មែរ និងមានរយៈពេលដាំប្រមាណ៤ទៅ៥ខែ។ វាគឺជាប្រភេទរុក្ខជាតិដែលមិនត្រូវការដីមានជាតិសំណើមខ្លាំងពេក ។ សណ្តែកដីអាចធន់ទ្រាំនឹងកម្តៅបានមិនលើសពី៣៨អង្សាសេ។

សណ្តែកដី គឺជាប្រភេទដំណាំមើមម្យ៉ាង ដែលពលរដ្ឋកម្ពុជានិយមយកវាមកធ្វើជាអាហារ ជាបង្អែម ជារបស់ដែលទទួលទានលេងកំដរមាត់ ដោយស្ងោរ លីង និងការកែច្នៃផ្សេងៗទៀត ។ សណ្តែកដី ក៏ជាគ្រឿងផ្សំសម្រាប់មុខម្ហូបបែបប្រពៃណីជាច្រើនដែរ ។

អត្ថបទទាក់ទង