លោកនាយករដ្ឋមន្រ្តី ហ៊ុន សែន មិនគាំទ្រការនាំចូលជ្រូកពីក្រៅស្រុក ព្រោះវាជាការសម្លាប់អ្នកចិញ្ចឹមជ្រូកនៅក្នុងស្រុក
លោកនាយករដ្ឋមន្រ្តី ហ៊ុន សែន មិនគាំទ្រការនាំចូលជ្រូកពីក្រៅស្រុក ព្រោះវាជាការសម្លាប់អ្នកចិញ្ចឹមជ្រូកនៅក្នុងស្រុកក្នុងពេលអញ្ជើញចុះទៅពិនិត្យមើលមជ្ឈមណ្ឌលស្រាវជ្រាវ និងអភិវឌ្ឍន៍ពូជត្រី និងជួបសំណេះសំណាលជាមួយបងប្អូនប្រជាកសិករ នៅស្រុកពាមរក៍ ខេត្តព្រៃវែង នៅព្រឹកថ្ងៃទី១៤ ខែកក្កដា ឆ្នាំ២០២០នេះ លោកនាយករដ្ឋមន្រ្តី ហ៊ុន សែន បានប្រកាស មិនគាំទ្រការនាំចូលជ្រូកពីថៃ ព្រោះជាការសម្លាប់អ្នកចិញ្ចឹមជ្រូកនៅកម្ពុជា។
លោកនាយករដ្ឋមន្រ្តី ហ៊ុន សែន បានបញ្ជាក់ថា «មានក្រុមហ៊ុនមួយ តាមរយៈក្រសួងកសិកម្ម រុក្ខាប្រមាញ់ និងនេសាទ បានស្នើសុំនាំជ្រូក ១លានក្បាលពីថៃ។ តែខ្ញុំបានចារថា ឲ្យសិក្សាសិន»។
លោកបន្តថា បើសិនជាយល់ព្រមឲ្យនាំជ្រូកចូលពីថៃ នោះជាការសម្លាប់អ្នកចិញ្ចឹមជ្រូកក្នុងស្រុក។ តែបើមានការនាំចូលជ្រូកពីក្រៅ គឺត្រឹមតែបំពេញតម្រូវការក្នុងស្រុក ដែលយើងខ្វះខាតជាង ១០% បានហើយ។
ជាមួយនឹងប្រសាសន៍ខាងលើនេះ លោកនាយករដ្ឋមន្រ្តី ហ៊ុន សែន បានជំរុញឲ្យប្រជាកសិករ ដាំដុះដំណាំបង្ការ និងចិញ្ចឹមសត្វ ជាពិសេសជ្រូក ត្រី កង្កែប ជាដើម៕
