ក្រសួងសុខាភិបាល រកឃើញករណីវិជ្ជមានកូវីដ-១៩ ថ្មី ២នាក់ និងជាសះស្បើយថ្មីចំនួន ២នាក់បន្ថែមទៀត
ក្រសួងសុខាភិបាល រកឃើញករណីវិជ្ជមានកូវីដ-១៩ ថ្មី ២នាក់ និងជាសះស្បើយថ្មីចំនួន ២នាក់បន្ថែមទៀតក្រសួងសុខាភិបាល នៃព្រះរាជាណាចក្រកម្ពុជា បានអោយដឹងនៅព្រឹកថ្ងៃទី៥ ខែសីហា ឆ្នាំ២០២០នេះថា រកឃើញករណីវិជ្ជមានកូវីដ-១៩ ថ្មី ២នាក់ និងជាសះស្បើយថ្មីចំនួន ២នាក់បន្ថែមទៀត។
បើតាមក្រសួងសុខាភិបាល អ្នកដែលមានវិជ្ជមានកូវីដ-១៩ ២នាក់ថ្មីនោះគឺ បុរសជនជាតិខ្មែរម្នាក់ និងស្ត្រីជនជាតិកាហ្សាក់ស្តង់ម្នាក់។ បុរសជនជាតិខ្មែរនោះ អាយុ ៣៤ឆ្នាំ មានអាស័យដ្ឋាន នៅភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្តាល ជាអ្នកបានធ្វើដំណើរ ពីប្រទេសប៉ាគីស្ថាន បន្តជើងយន្តហោះ នៅប្រទេសម៉ាឡេស៊ី មុនពេលមកដល់កម្ពុជា។ រីឯស្ត្រីជនជាតិកាហ្សាក់ស្តង់ អាយុ ៤២ឆ្នាំ បានធ្វើដំណើរពីប្រទេសកាហ្សាក់ស្តង់ បន្តជើងហោះហើរ នៅប្រទេសកូរ៉េខាងត្បូង មកដល់ប្រទេសកម្ពុជា កាលពីថ្ងៃទី០៣ ខែសីហា ឆ្នាំ២០២០។
ចំណែកឯអ្នកជាសះស្បើយចំនួន ២នាក់ថ្មីនេះរួមមាន៖
១) ស្ត្រីជនជាតិខ្មែរ អាយុ ៦០ឆ្នាំ ដែលមានអាស័យដ្ឋានស្នាក់នៅបុរីប៉េងហួត បឹងស្នោរ ខណ្ឌច្បារអំពៅ រាជធានីភ្នំពេញ បានធ្វើដំណើរមកពីសហរដ្ឋអាមេរិក បន្តជើងហោះហើរ នៅប្រទេសចិន មុនពេលមកដល់កម្ពុជា
២) កុមារីជនជាតិអាមេរិក ស្នាក់នៅក្នុងស្ថានទូតអាមេរិក ប្រចាំកម្ពុជា ដែលបានធ្វើដំណើរពីសហរដ្ឋអាមេរិក បន្តជើងហោះហើរ នៅប្រទេសកូរ៉េខាងត្បូង មុនមកដល់កម្ពុជា
គួរបញ្ជាក់ថា បើគិតត្រឹមម៉ោង ៧ព្រឹក ថ្ងៃទី៥ ខែសីហា ឆ្នាំ២០២០នេះ ចំនួនអ្នកឆ្លងកូវីដ-១៩ នៅទូទាំងប្រទេសសរុបចំនួន ២៤៣នាក់ ជាសះស្បើយសរុបចំនួន ២០២នាក់ និងកំពុងសម្រាកព្យាបាលបន្តចំនួន ៤១នាក់ ក្នុងនោះសម្រាកព្យាបាលនៅពេទ្យរបស់រដ្ឋចំនួន ៣៩នាក់ និង ១នាក់ នៅក្នុងបន្ទប់ដាច់ដោយឡែករបស់ស្ថានទូតអាមេរិក។
សូមអាននូវសេចក្ដីជូនដំណឹងលម្អិតពីក្រសួងសុខាភិបាលដូចខាងក្រោម៖
