ឯកអគ្គរាជទូតជប៉ុន៖ ក្រសួងផែនការ ដើរតួនាទីយ៉ាងសំខាន់ក្នុងការអនុវត្ត និងផ្ដល់នូវប្រភពទិន្នន័យមួយដែលបានមកពីការធ្វើជំរឿន សម្រាប់ក្រុមហ៊ុនវិនិយោគរបស់ជប៉ុន
ឯកអគ្គរាជទូតជប៉ុន៖ ក្រសួងផែនការ ដើរតួនាទីយ៉ាងសំខាន់ក្នុងការអនុវត្ត និងផ្ដល់នូវប្រភពទិន្នន័យមួយដែលបានមកពីការធ្វើជំរឿន សម្រាប់ក្រុមហ៊ុនវិនិយោគរបស់ជប៉ុននារសៀលថ្ងៃទី១២ ខែវិច្ឆិកា ឆ្នាំ២០២០ឯកឧត្តម MIKAMI Masahiro ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុន ប្រចាំនៅព្រះរាជាណាចក្រកម្ពុជាបានលើកឡើងពីសារៈសំខាន់នៃទិន្នន័យជាច្រើន ដែលបានមកពីការធ្វើជំរឿន និងអង្កេតផ្សេងៗទៀត ដែលវិទ្យាស្ថានជាតិស្ថិតិ នៃក្រសួងផែនការ ដើរតួនាទីយ៉ាងសំខាន់ក្នុងការអនុវត្ត ដើម្បីសម្រេចបាននូវប្រភពទិន្នន័យមួយដែលមានគុណភាព និងមានសារៈសំខាន់ ជាជំនួយស្មារតីដល់ដៃគូអភិវឌ្ឍន៍នានា ក៏ដូចជាក្រុមហ៊ុនវិនិយោគរបស់ជប៉ុន ស្វែងរកឱកាសវិនិយោគថ្មីៗទៀត មកកាន់ព្រះរាជាណាចក្រកម្ពុជា។
ការលើកឡើងនេះ ក្នុងជំនួបសម្ដែងការគួរសម និងពិភាក្សាការងារជាមួយ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ កាលពីរសៀលថ្ងៃទី១២ ខែវិច្ឆិកា ឆ្នាំ២០២០ ក្នុងគោលបំណងបង្កើនកិច្ចសហប្រតិបត្តិការក្នុងក្របខ័ណ្ឌទ្វេភាគី និងការស្វែងរកព័ត៌មាន ឬទិន្នន័យថ្មីៗ ដែលក្រសួងផែនការសម្រេចបាន ដើម្បីជាមូលដ្ឋានគ្រឺះសម្រាប់ក្រុមហ៊ុនជប៉ុន ស្វែងរកឱកាសវិនិយោគនៅកម្ពុជា ឱ្យកាន់តែច្រើនឡើងបន្ថែមទៀត។ នេះបើយោងតាមក្រសួងផែនការ។
ឯកឧត្តម MIKAMI Masahiro បានថ្លែងការកោតសរសើរចំពោះរាជរដ្ឋាភិបាល និងប្រជាជនកម្ពុជា ដែលបានចូលរួមចំណែកយ៉ាងសកម្ម និងអាចទប់ស្កាត់បាននូវការរីករាលដាលនៃជំងឺកូវីដ១៩ ដែលពិភពលោក និងប្រទេសជប៉ុន បានកំពុងជួបប្រទះដូចគ្នា។ ឯកឧត្ដមបានបញ្ជាក់ថា ស្ថិតក្នុងកាលៈទេសៈនេះ ជប៉ុនបានប្រកាសផ្តល់ជំនួយសង្គ្រោះបន្ទាន់ រួមទាំងប្រកាសផ្តល់នូវហិរញ្ញប្បទានឥតសំណងដល់កម្ពុជាផងដែរ ក្នុងការទប់ស្កាត់ ការរីករាលដាលជំងឺកូវីដ១៩ ក៏ដូចជាធ្វើឱ្យប្រសើរឡើងវិញនូវការកសាងសេដ្ឋកិច្ចកម្ពុជា ក្នុងអំឡុងពេល និងក្រោយ នៃការរីករាលដាលជំងឺកូវីដ១៩។
ឯកឧត្តមកិត្តិសេដ្ឋាបណ្ឌិត ទេសរដ្ឋមន្ត្រី ឆាយ ថន បានថ្លែងនូវអំណរអរគុណចំពោះរដ្ឋាភិបាល និងប្រជាជនជប៉ុន ដែលតែងតែផ្តល់ជំនួយឧបត្ថម្ភគាំទ្រគ្រប់បែបយ៉ាងដល់រាជរដ្ឋាភិបាល និងប្រជាជនកម្ពុជា ទាំងស្មារតី និងសម្ភារ ដែលជាផ្នែកមួយមិនអាចកាត់ផ្តាច់បាន ចំពោះសុខសន្តិភាព និងការអភិវឌ្ឍរីកចម្រើនរបស់កម្ពុជាដូចសព្វថ្ងៃ ជាពិសេសក្នុងអំឡុងពេលសម័យអ៊ុនតាក់ ជប៉ុន បានដើរតួនាទីយ៉ាងសំខាន់ក្នុងការស្វែងរកសន្តិភាពនៅកម្ពុជា។ ទន្ទឹមនេះ តាមរយៈអង្គការ JICA ក្នុងកិច្ចសហប្រតិបត្តិការទ្វេរភាគីជាមួយក្រសួងផែនការ ចាប់តាំងពីឆ្នាំ២០០៥ មកដល់ដំណាច់ឆ្នាំ២០១៥ ភាគីជប៉ុនបានចូលរួមចំណែកយ៉ាងសំខាន់ជួយដល់ក្រសួងផែនការ រួមមានទាំងការបណ្តុះបណ្តាលមន្ត្រីជំនាញ ប្រមាណជាង៦០០នាក់ផ្តល់នូវអគារកម្ពស់៥ជាន់ សម្រាប់ដំណើការធ្វើជំរឿនប្រជាជនទូទៅនៅព្រះរាជាណាចក្រកម្ពុជា ឆ្នាំ២០០៨ រួមសហការគ្នាជាមួយអង្គការUNFPA ក្នុងការធ្វើជំរឿនប្រជាជនទូទៅនៅព្រះរាជាណាចក្រកម្ពុជាឆ្នាំ២០០៨ ការធ្វើបញ្ជីសហគ្រាសទូទាំងប្រទេសឆ្នាំ២០០៩ ការធ្វើជំរឿនសេដ្ឋកិច្ចឆ្នាំ២០១១ ដែលជាការងារជាតិដំបូងមិនធ្លាប់មាននៅក្នុងប្រវត្តិសាស្ត្រកម្ពុជា រួមទាំងការអង្កេតចន្លោះជំរឿនប្រជាជនឆ្នាំ២០១៣ អង្កេតចន្លោះជំរឿនសេដ្ឋកិច្ចឆ្នាំ២០១៤ និងជំនួយបច្ចេកទេស សម្ភារ ដល់មន្ទីរផែនការ នៅថ្នាក់ក្រោមជាតិ ទាំង២៥រាជធានី ខេត្តផងដែរ។
ឯកឧត្តមកិត្តិសេដ្ឋាបណ្ឌិតបានបន្ថែមថា នៅរយៈពេលដ៏ខ្លីខាងមុខ ក្រសួងផែនការ នឹងរៀបចំប្រកាសលទ្ធផលជំរឿនទូទៅប្រជាជននៅព្រះរាជាណាចក្រកម្ពុជា ឆ្នាំ២០១៩ ជាផ្លូវការ ហើយទិន្នន័យជំរឿននេះ គឺជាប្រភពទិន្នន័យដ៏សំខាន់ សម្រាប់ភាគីពាក់ព័ន្ធ ដៃគូអភិវឌ្ឍន៍ និងជាពិសេសក្រុមហ៊ុនវិនិយោគជប៉ុន ដើម្បីស្វែងរកឱកាសវិនិយោគថ្មីៗនៅកម្ពុជា។ ឯកឧត្ដមឯកអគ្គរាជទូតជប៉ុនកត់សម្គាល់ឃើញថា កម្ពុជា មានសុខសន្តិភាព និងការអភិវឌ្ឍដូចសព្វថ្ងៃ មិនមែនកើតមកដោយឯកឯងនោះទេ ជប៉ុនគ្រាន់តែជាផ្នែកមួយប៉ុណ្ណោះ ហើយឯកឧត្ដមបានកោតសរសើរចំពោះរាជរដ្ឋាភិបាល និងប្រជាជនកម្ពុជា ដែលបានបង្កើតឡើងដោយខ្លួនឯងនូវសន្តិភាព និងការអភិវឌ្ឍមួយដ៏ពិតប្រាកដ ក្រោមការដឹកនាំរបស់សម្តេចតេជោ ហ៊ុន សែន ដែលធ្វើឱ្យកម្ពុជាសម្រេចបាននូវចក្ខុវិស័យមួយដ៏វែងឆ្ងាយ ប្រកបដោយការអភិវឌ្ឍរីកចម្រើន។ ជាមួយគ្នានេះដែរ ឯកឧត្តម ឯកឧត្ដមឯកអគ្គរាជទូតក៏បានមើលឃើញពីការរីកចម្រើនខាងវិស័យបច្ចេកវិទ្យា ឌីជីថល នៅព្រះរាជាណាចក្រកម្ពុជា មានការរីកចម្រើនគួរឱ្យកត់សម្គាល់ ដែលទៅថ្ងៃមុខ ជប៉ុនក៏អាចនឹងមានឱកាសរៀនសូត្រពីកម្ពុជាលើវិស័យបច្ចេកវិទ្យា ឌីជីថល ផងដែរ។
ឯកឧត្តមកិត្តិសេដ្ឋាបណ្ឌិតទេសរដ្ឋមន្ដ្រី ឆាយ ថន ក៏បានអរគុណផងដែរចំពោះរដ្ឋាភិបាល និងប្រជាជនជប៉ុន ដែលតែងតែយកចិត្តទុកអភិវឌ្ឍន៍ធនធានមនុស្សរបស់កម្ពុជា តាមរយៈការផ្តល់នូវអាហារូបករណ៍ដល់និស្សិត និងមន្ត្រីរាជការកម្ពុជា។ ទន្ទឹមនេះ រាជរដ្ឋាភិបាលកម្ពុជា មានមហិច្ឆតាក្នុងកំណែទម្រង់សេដ្ឋកិច្ចស៊ីជម្រៅ ប្រែក្លាយទៅជាសេដ្ឋកិច្ចឌីជីថល ស្របតាមការរីកចម្រើនផ្នែកវិស័យបច្ចេកវិទ្យាសកល៕
