ខ្មែរប៉ុស្ដិ៍ Close

អភិបាលខេត្តកំពត ក្រើនរំលឹកអំពាវនាវដល់ប្រជាពលរដ្ឋត្រូវបន្តអនុវត្តវិធានការ ៣កុំ និង៣ការពារ ប្រកបដោយស្មារតីប្រុងប្រយ័ត្នខ្ពស់បំផុត

ដោយ៖ លី វិទ្យា ​​ | ថ្ងៃចន្ទ ទី២៩ ខែមីនា ឆ្នាំ២០២១ ព័ត៌មានទូទៅ 1351
អភិបាលខេត្តកំពត ក្រើនរំលឹកអំពាវនាវដល់ប្រជាពលរដ្ឋត្រូវបន្តអនុវត្តវិធានការ ៣កុំ និង៣ការពារ ប្រកបដោយស្មារតីប្រុងប្រយ័ត្នខ្ពស់បំផុតអភិបាលខេត្តកំពត ក្រើនរំលឹកអំពាវនាវដល់ប្រជាពលរដ្ឋត្រូវបន្តអនុវត្តវិធានការ ៣កុំ និង៣ការពារ ប្រកបដោយស្មារតីប្រុងប្រយ័ត្នខ្ពស់បំផុត

នៅវិទ្យាល័យហ៊ុនសែនត្រសេកកោង ស្រុកទឹកឈូ ខេត្តកំពត លោក ជាវ តាយ អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពត បានអញ្ជើញចែកអំណោយកាកបាទក្រហមជូនដល់ប្រជាពលរដ្ឋងាយរងគ្រោះបំផុត ចំនួន ៥០គ្រួសារ នៅឃុំថ្មី និងឃុំព្រៃថ្នង ស្រុកទឹកឈូ ខេត្តកំពត នៅថ្ងៃទី ២៩ ខែមីនា ឆ្នាំ ២០២១ អញ្ជើញចូលរួមក្នុងពិធីនេះរួមមាន លោក លោកស្រី សមាជិកគណៈកម្មាធិការ កងកម្លាំងទាំងបី ប្រធានមន្ទីរ អង្គភាព សមាជិកអនុសាខាស្រុក និងប្រជាពលរដ្ឋសរុប ៧០នាក់។

ថ្លែងនៅក្នុងពិធីនោះ លោក ជាវ តាយ បានពាំនាំនូវការផ្តាំផ្ញើសាកសួរសុខទុក្ខពីសំណាក់ លោកនាយករដ្ឋមន្រ្តី ហ៊ុន សែន និងលោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូរខ្ពស់ពីសុខទុក្ខ និងមានការដោះស្រាយបញ្ហាប្រឈមនានា ជូនបងប្អូនប្រជាពលរដ្ឋ មិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬ និន្នាការនយោបាយ ដោយមិនដែលទុកចោលឲ្យប្រជាពលរដ្ឋណាម្នាក់ស្លាប់ដោយអត់ស្បៀងអាហារ ដោយមិនមានការដោះស្រាយអ្វីឡើយ។

ជាមួយនេះផងដែរ លោកអភិបាលខេត្ត បន្តថា បើទោះបីអំណោយដែលបានចែកជូនប្រជាពលរដ្ឋនាពេលនេះ មានចំនួនតិចតួចក្ដី ប៉ុន្តែក៏អាចជួយសម្រាលការលំបាកខ្វះខាតរបស់បងប្អូនបានមួយគ្រាផងដែរ។ លោក ក៏បានក្រើនរំលឹកអំពាវនាវដល់បងប្អូនប្រជាពលរដ្ឋ ត្រូវបន្តបង្កើនការប្រុងប្រយ័ត្ន យកចិត្តទុកដាក់ឲ្យបានខ្ពស់បន្ថែមទៀត ដោយចូលរួមអនុវត្តតាមវិធានការណែនាំរបស់ក្រសួងសុខាភិបាលឱ្យបានគ្រប់ៗគ្នា នូវវិធានការ ៣ការពារ(ពាក់ម៉ាសនៅទីសាធារណៈ លាងដៃជាមួយសាប៊ូ អាល់កុល ឬជែល រក្សាគម្លាតសុវត្ថិភាពសង្គមចាប់ពីមួយម៉ែត្រកន្លះឡើងទៅ) និង ៣កុំ(កុំចូលទៅកន្លែងបិទជិតគ្មានខ្យល់ចេញចូល កុំចូលទៅកន្លែងមានមនុស្សច្រើនកុះករ កុំប៉ះពាល់គ្នា) ក្នុងការចូលរួមទប់ស្កាត់ និងការពារជំងីកូវីដ-១៩។

នាឱកាសនោះផងដែរ អំណោយកាកបាទក្រហមចែកជូនប្រជាពលរដ្ឋងាយរងគ្រោះ ចំនួន៥០គ្រួសារ ក្នុង០១គ្រួសារ ទទួលបាន៖ អង្ករ ២៥គីឡូក្រាម មី១កេះ ទឹកត្រី១យួរ ស្ករស១គីឡូក្រាម និងថវិកា២ម៉ឺនរៀល ព្រមទាំងបានឧបត្ថម្ភជូនទីប្រឹក្សាយុវជន យុវជនកាកបាទក្រហម អ្នកស្មគ្រ័ចិត្តកាកបាទក្រហម នគរបាល កងរាជអាវុធហត្ថ និងប្រជាការពារ សរុបចំនួន៣៣ម៉ឺនរៀល៕