អាស៊ានស្វាគមន៍ចំពោះការគាំទ្រថវិការបស់ជប៉ុនចំនួន ១០ប៊ីលានដុល្លារអាមេរិកសម្រាប់ការកាត់បន្ថយការបំភាយឧស្ម័នកាបូនិច
អាស៊ានស្វាគមន៍ចំពោះការគាំទ្រថវិការបស់ជប៉ុនចំនួន ១០ប៊ីលានដុល្លារអាមេរិកសម្រាប់ការកាត់បន្ថយការបំភាយឧស្ម័នកាបូនិចសមាគមប្រជាជាតិអាស៊ីអាគ្នេយ៍ (អាស៊ាន) បានស្វាគមន៍ចំពោះការសន្យារបស់ប្រទេសជប៉ុនក្នុងការផ្តល់ថវិកាចំនួន ១០ប៊ីលានដុល្លារអាម៉េរិកក្នុងការគាំទ្រផ្នែកហិរញ្ញវត្ថុសម្រាប់កិច្ចខិតខំប្រឹងប្រែងកាត់បន្ថយការបំភាយឧស្ម័នកាបូនិចដោយរដ្ឋជាសមាជិករបស់ខ្លួន។
សេចក្តីថ្លែងការណ៍រួមមួយដែលចេញផ្សាយបន្ទាប់ពីកិច្ចប្រជុំតាមប្រព័ន្ធអនឡាញកាលពីថ្ងៃទី ២១ ខែមិថុនា រវាងបណ្តារដ្ឋមន្ត្រីថាមពលអាស៊ាន និងរដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន លោក Hiroshi Kajiyama បាននិយាយថា ពួកគេបានចែករំលែកតម្រូវការសម្រាប់ការផ្តល់ហិរញ្ញប្បទានគ្រប់គ្រាន់ដើម្បីគាំទ្រដល់ដំណើរផ្លាស់ប្តូរថាមពលក្នុងតំបន់ដែលពាក់ព័ន្ធនឹងវិធានការណ៍កាត់បន្ថយការសាយភាយឧស្ម័នកាបូនឌីអុកស៊ីត និងបង្កើននូវការប្រើប្រាស់ថាមពលកកើតឡើងវិញ។
សេចក្តីថ្លែងការណ៍នោះបាននិយាយថា «ដោយមើលឃើញអំពីបញ្ហាប្រឈមដែលមិនធ្លាប់មានដោយសារជំងឺរាតត្បាតកូវីដ-១៩ កិច្ចប្រជុំនេះបានទទួលស្គាល់ពីភាពបន្ទាន់នៃការដោះស្រាយការស្តារឡើងវិញក្រោយជំងឺរាតត្បាតប្រកបដោយចីរភាព និងបានបញ្ជាក់អំពីសារៈសំខាន់នៃការផ្លាស់ប្តូរថាមពលឆ្ពោះទៅរកការអភិវឌ្ឍប្រកបដោយចីរភាព»។
យោងតាមសេចក្តីថ្លែងការណ៍នោះបានឱ្យដឹងថា «គំនិតផ្តួចផ្តើមការផ្លាស់ប្តូរថាមពលអាស៊ីរបស់ជប៉ុន» ក៏នឹងរួមបញ្ចូលផងដែរនូវ «ការអភិវឌ្ឍធនធានមនុស្សតាមរយៈសិក្ខាសាលាបណ្តុះបណ្តាល ការសិក្សា និងរបាយការណ៍ផ្សេងៗ ព្រមទាំងសកម្មភាពចែករំលែកចំណេះដឹងនានាផងដែរ»។
មន្ត្រីជប៉ុនបាននិយាយថា ការបណ្តុះបណ្តាលទៅលើបច្ចេកវិទ្យាថ្មី ដូចជាការប្រើប្រាស់អ៊ីដ្រូសែន និងការចាប់យក និងការផ្ទុកកាបូននឹងត្រូវបានផ្តល់ដល់មនុស្សប្រមាណ ១ ០០០នាក់នៅក្នុងតំបន់។
គំនិតផ្តួចផ្តើមនេះមានគោលបំណងមិនត្រឹមតែកាត់បន្ថយការបំភាយឧស្ម័នផ្ទះកញ្ចក់នៅក្នុងតំបន់ប៉ុណ្ណោះទេ ប៉ុន្តែថែមទាំងពង្រីកឱកាសអាជីវកម្មសម្រាប់បណ្តាក្រុមហ៊ុនរបស់ជប៉ុនទៀតផង៕
