ចម្លាក់ និង គំនូរនៅ «វត្តដំរីស»
RFIនាទីអារ្យធម៌ សូមនាំអារម្មណ៍លោកអ្នកនាង ទៅខេត្តបាត់ដំបង ជាថ្មីម្តងទៀត ដើម្បីឈ្វេងយល់ត្រួសៗ ពីចម្លាក់ និងគំនូរ នៅវត្តដំរីស។ វត្តដំរីស ជាវត្តបុរាណ សាងសង់នៅគ្រាដែល ដែនដីប៉ែកពាយព្យមួយនេះ ចំណុះសៀម។ វត្តនេះ ឈ្មោះដើមថា «ទេវរាជកញ្ជរជ័យ» ព្រោះហេតុថាមានជាប់ពាក់ព័ន្ធប្រវត្តិ ដឹកដំរីស ពីខេត្តពោធិសាត់ ទៅថ្វាយព្រះចៅសៀម នៅក្រុងទេព ហើយដោយត្រូវឈប់ចតនៅទីលានរោងដំរីនៅបាត់ដំបង។
ក្នុងនាទីនេះ លោកអ្នកនាងនឹងបានស្តាប់ប្រសាសន៍របស់វិចិត្រករ របូរ ហាក់, ព្រឹទ្ធាចារ្យ ឡុច ឆានឆៃ និងបេក្ខបណ្ឌិត ទុយ ដាណែល ។
-លោក បូរ ហាក់ ធ្លាប់យកស្នាដៃវិចិត្រកម្ម តាំងបង្ហាញ នៅរដ្ឋធានីប៉ារីស បានសារភាពថា វណ្ណកម្មសិល្បៈនៅវត្តដំរីស បានជិះឥទ្ធិពលលើចិត្តគំនិតរបស់លោក និងសិល្បករផ្សេងទៀតនៅបាត់ដំបង ពិសេសខាងក្បាច់បុរាណ។
-ព្រឹទ្ធាចារ្យ ឡុច ឆានឆៃ ជាសាច់សារលោហិតរបស់វង្សត្រូកូលអភ័យវង្ស សព្វថ្ងៃរស់នៅក្រុងប៉ារីស បានរៀបរាប់ថា សិល្បៈនៅវត្តដំរីស ជាអត្តសញ្ញាណយ៉ាងពិសេសមួយបែបនៃអ្នកបាត់ដំបង។
-បេក្ខបណ្ឌិតប្រវត្តិសិល្បៈ លោក ទុយ ដាណែល ដែលកំពុងតាក់តែងនិក្ខេបបទ នៅក្រុងប៉ារីស បានចូលខ្លួនមករៀបរាប់ចំណុចពិសេសៗរបស់សិល្បៈវត្តដំរីស៕ ហេង ឧត្តម / RFI
