តម្លៃប្រេងនៅចក្រភពអង់គ្លេសបន្តឡើងកាន់តែខ្លាំង
តម្លៃប្រេងនៅចក្រភពអង់គ្លេសបន្តឡើងកាន់តែខ្លាំងក្រុមហ៊ុនរបស់ចក្រភពអង់គ្លេស «RAC» បានរាយការណ៍កាលពីថ្ងៃអង្គារថា «តម្លៃប្រេងសាំងនិងប្រេងម៉ាស៊ូតនៅចក្រភពអង់គ្លេសបានកើន ឡើងដល់កម្រិតខ្ពស់បំផុតកាលពីចុងសប្តាហ៍មុន» ហើយក្រុមហ៊ុននេះក៏បានលើកឡើងផងដែរអំពី «និន្នាការដ៏គួរឱ្យព្រួយបារម្ភនៃតម្លៃប្រេងឥន្ធនៈដែលបាន បន្តកើនឡើងឥតឈប់ឈរនៅក្នុងប្រទេស»។
ក្រុមហ៊ុន RAC បានបង្ហោះនៅលើគេហទំព័ររបស់ខ្លួនថា «កាលពីថ្ងៃអាទិត្យ តម្លៃជាមធ្យមនៃប្រេងសាំងបានកើន ដល់កំណត់ត្រាថ្មីគឺ ២,៣២ ដុល្លារអាមេរិកក្នុងមួយលីត្រ»។ ក្រុមហ៊ុននេះបានបន្ថែមថា «តម្លៃប្រេងបានបន្តកើនឡើងនៅ ក្នុងរយៈពេល ៥ សប្តាហ៍ជាប់ៗគ្នា ខណៈដែលកាលពីពាក់កណ្តាលខែឧសភា ប្រេងសាំងមួយលីត្រមានតម្លៃ ២,០២ ដុល្លារអាមេរិក»។
ទិន្នន័យរបស់ RAC បានបង្ហាញថា «ប្រេងម៉ាស៊ូតក៏បានកើន ឡើងដល់កម្រិតខ្ពស់បំផុតមិនធ្លាប់មានផង ដែរកាលពីថ្ងៃសៅរ៍កន្លងទៅនេះ ដោយបានឈានដល់តម្លៃ ២,៤០ ដុល្លារអាមេរិកក្នុងមួយលីត្រ»។ អ្នកនាំពាក្យរបស់ RAC លោក Simon Williams បាននិយាយថា «សម្រាប់រថយន្តគ្រួសារការចាក់សាំងបំពេញធុង ៥៥ លីត្រនៅពេលឥឡូវនេះមានតម្លៃដល់ជិត ១០៤ ផោន (១២៧ ដុល្លារអាមេរិក) ខណៈដែលប្រេងម៉ាស៊ូតមានតម្លៃជិត ១០៨ ផោន (១៣២ ដុល្លារ)»។
យោងតាម RAC «ការកើនឡើងនៃតម្លៃប្រេងឥន្ធនៈនឹងបង្កឱ្យមានវិបត្តិតម្លៃនៃការចំណាយលើការរស់នៅប្រចាំថ្ងៃ ហើយស្ថានការណ៍បាននិងកំពុងវិវឌ្ឍកាន់តែអាក្រក់ទៅៗ បន្ទាប់ពីមានកូដកម្មនៅលើផ្លូវដែកនៅក្នុងសប្តាហ៍នេះនៅចក្រភពអង់គ្លេស»។ ក្រុមហ៊ុននេះបានកត់សម្គាល់ថា «នៅពេលឥឡូវនេះ តម្លៃសាំងអាចនឹងឈប់ឡើងថ្លៃ ពីព្រោះតម្លៃប្រេងបានធ្លាក់ចុះបន្តិចហើយ»។
បច្ចុប្បន្ន ប្រេងឆៅ ប្រភេទ Brent របស់ពិភពលោកកំពុងត្រូវបានជួញដូរក្នុងតម្លៃ ១១៦ ដុល្លារក្នុងមួយបារ៉ែល បន្ទាប់ពីបានឡើងដល់កម្រិតខ្ពស់បំផុតក្នុងរយៈពេលជាច្រើនសប្តាហ៍ (ជាង ១២៣ ដុល្លារកាលពី ២ សប្តាហ៍មុន)។
ក្រុមហ៊ុន RAC បាន និយាយថា «ទោះជា យ៉ាងណាក៏ដោយ ប្រេងម៉ាស៊ូតអាចនឹងកាន់តែមានតម្លៃថ្លៃជាងមុន ដោយក្នុងនោះ ការចាក់មួយពេញធុងអាចមានតម្លៃរហូតដល់ ១១០ ផោន (ជាង $១៣៥)»។ RT
