ប្រសាសន៍សំខាន់ៗរបស់សម្តេចតេជោ ហ៊ុន សែន ឱកាសអញ្ជើញប្រគល់សញ្ញាបត្រ ជូននិស្សិតសាកលវិទ្យាល័យអាស៊ី-អឺរ៉ុប ជាង ៣ពាន់នាក់
ប្រសាសន៍សំខាន់ៗរបស់សម្តេចតេជោ ហ៊ុន សែន ឱកាសអញ្ជើញប្រគល់សញ្ញាបត្រ ជូននិស្សិតសាកលវិទ្យាល័យអាស៊ី-អឺរ៉ុប ជាង ៣ពាន់នាក់នៅព្រឹកថ្ងៃទី២៣ ខែសីហា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអញ្ជើញប្រគល់សញ្ញាបត្រ ជូននិស្សិតជយលាភីរបស់សាកលវិទ្យាល័យអាស៊ី-អឺរ៉ុបប្រមាណ ៣,០៧៥នាក់។ វត្តមានរបស់សម្តេចតេជោនៅថ្ងៃនេះ គឺជាលើកទី ១៤ ហើយ ដែលសម្តេចតេជោ បានអញ្ជើញចែកសញ្ញាបត្រ និងវិញ្ញាបនបត្រជូននិស្សិត និងសិស្សរបស់អង្គការ និងសាកលវិទ្យាល័យអាស៊ី-អឺរ៉ុប គិតចាប់តាំងពីឆ្នាំ២០០៣មក។
នៅក្នុងឱកាសនោះ សម្តេចតេជោ ហ៊ុន សែន បានថ្លែងសុន្ទរកថាសំណេះសំណាលប្រមាណ១ម៉ោង៤០នាទី, ខាងក្រោមជាប្រសាសន៍សំខាន់ៗរបស់សម្តេច៖
- សម្តេចតេជោ ហ៊ុន សែន ចាប់ផ្តើមថ្លែងសុន្ទរកថា ក្នុងឱកាសអញ្ជើញប្រគល់សញ្ញាបត្រ ជូននិស្សិតជយលាភីរបស់សាកលវិទ្យាល័យអាស៊ី-អឺរ៉ុប ចំនួន៣,០៧៥នាក់ នៅព្រឹកថ្ងៃទី២៣ ខែសីហា ឆ្នាំ២០២២
- សម្តេចតេជោ ហ៊ុន សែន បានថ្លែងកោតសរសើរក្រសួងអប់រំ យុវជន និងកីឡា ដែលបានយកចិត្តទុកដាក់លើការបណ្តុះបណ្តាលធនធានមនុស្ស ជាពិសេសជម្នះការលំបាកក្នុងពេលមានវិបត្តិជំងឺកូវីដ-១៩។
- សម្តេចតេជោ ហ៊ុន សែន បានគូសរំលេចជាថ្មីថា ជំងឺកូវីដ-១៩ ដ្បិតនាំមកនូវវិបត្តិសម្រាប់ការសិក្សា តែក៏បានធ្វើឱ្យមានកាលនុវត្តន៍ភាពលើប្រព័ន្ធឌីជីថលផងដែរ។
- សម្តេចតេជោ ហ៊ុន សែន បានថ្លែងកោតសរសើរដល់គ្រឹះស្ថានសិក្សាទាំងអស់ ដែលបានប្រឹងប្រែងជម្នះការលំបាកពេលមានវិបត្តិជំងឺកូវីដ-១៩ ដោយមិនទុកឱ្យសាលាត្រូវដួល ឬសិស្សបាត់បង់ការអប់រំនោះឡើយ។
- សម្តេចតេជោ ហ៊ុន សែន បានថ្លែងថា ការចូលរួមអនុវត្តន៍វិធានការ «៣កុំ និង៣ការពារ» និងការចូលរួមទទួលយកវ៉ាក់សាំង សុទ្ធសឹងជាការចូលរួមប្រយុទ្ធប្រឆាំងនឹងជំងឺកូវីដ-១៩ ហើយធ្វើឱ្យកម្ពុជាយកឈ្នះលើការរាតត្បាតជំងឺកូវីដ-១៩។
- សម្តេចតេជោ ហ៊ុន សែន បានថ្លែងថា ការយកឈ្នះលើជំងឺកូវីដ-១៩ បានធ្វើឱ្យកម្ពុជាអាចរៀបចំកិច្ចប្រជុំកម្រិតតំបន់ និងអន្តរជាតិឡើងវិញ កាលពីខែដើមខែសីហា កន្លងទៅនេះ។
- សម្តេចតេជោ ហ៊ុន សែន បានថ្លែងកោតសរសើរដល់និស្សិតទាំងអស់ ដែលបានប្រឹងប្រែងសិក្សារៀនសូត្រក្នុងដំណាក់កាលដ៏លំបាក នៃការរាតត្បាតជំងឺកូវីដ-១៩។
- សម្តេចតេជោ ហ៊ុន សែន បានថ្លែងថា ឱកាសមានច្រើនសម្រាប់យុវជនកម្ពុជា នាពេលបច្ចុប្បន្ន។
- សម្តេចតេជោ ហ៊ុន សែន បានថ្លែងថា ក្នុងសម័យនេះយុវជនមានឱកាសច្រើនណាស់ បើធៀបនឹងយុវជនក្នុងសម័យសង្គ្រាម ដែលបាត់បង់ទាំងស្រុងនូវឱកាសសម្រាប់ការសិក្សារៀនសូត្រ។
- សម្តេចតេជោ ហ៊ុន សែន បានថ្លែងថា ក្រោយរំដោះប្រទេសចេញពីរបបប្រល័យពូជសាសន៍ ប៉ុល ពត នៅឆ្នាំ១៩៧៩ ការបណ្តុះបណ្តាលនៅកម្ពុជាជួបការលំបាកខ្លាំងណាស់។ ក្នុងនោះគ្រូត្រូវបានជ្រើសរើសអ្នកដែលមិនធ្លាប់មានបទពិសោធន៍ក្នុងការបង្រៀន។
- សម្តេចតេជោ ហ៊ុន សែន បានថ្លែងថា ការសិក្សាអប់រំនៅកម្ពុជា មិនចំណុះលើការប្រមាថរបស់គេនោះទេ សំខាន់លើការប្រឹងប្រែងពង្រឹងនូវការអប់រំ។
- សម្តេចតេជោ ហ៊ុន សែន បានថ្លែងថា រាជរដ្ឋាភិបាលទទួលស្គាល់ចំណុចខ្សោយ ហើយត្រូវធ្វើការកែលំអរ ដែលក្រសួងអប់រំ បានខិតខំជាខ្លាំង។
- សម្តេចតេជោ ហ៊ុន សែន បានថ្លែងថា រាជរដ្ឋាភិបាលទទួលស្គាល់ចំណុចខ្សោយលើការអប់រំ ដែលត្រូវធ្វើការកែលំអរ ហើយក្រសួងអប់រំ បានខិតខំជាខ្លាំងក្នុងការលើកកម្ពស់ការអប់រំ។
- សម្តេចតេជោ ហ៊ុន សែន បានថ្លែងថា ក្រុមអ្នកដែលប្រមាថការអប់រំនៅកម្ពុជា គឺទទួលបានបណ្ឌិតពីកម្ពុជា ហើយពេលទៅក្រៅប្រទេសគេហៅបណ្ឌិត។
- សម្តេចតេជោ ហ៊ុន សែន បានថ្លែងថា ពីមុនសិស្សរត់រកសាលា តែបច្ចុប្បន្នសាលារត់រកសិស្ស។
- សម្តេចតេជោ ហ៊ុន សែន បានថ្លែងថា ជារឿងគួរឱ្យកត់សម្គាល់មុនសម័យកូវីដ-១៩ មានអ្នកប្រឡងជាប់និទ្ទេសតិច តែក្នុងសម័យកូវីដ-១៩ រៀនតាមអនឡាញ ធ្វើឱ្យសិស្សនិទ្ទេស A កើន៣ដង។ សម្រាប់សម្តេចតេជោ បញ្ជាក់ថា សញ្ញាណនេះបង្ហាញឱ្យឃើញថា សិស្សព្យាយាមស្វ័យសិក្សា។
- សម្តេចតេជោ ហ៊ុន សែន បានថ្លែងថា គ្រូពេទ្យហត់ពេកហើយ ក្នុងដំណាក់កាលរាតត្បាតនៃជំងឺកូវីដ-១៩នេះ។
- សម្តេចតេជោ ហ៊ុន សែន បានថ្លែងថា ប្រាក់បៀវត្សរ៍គ្រូបង្រៀន និងគ្រូពេទ្យដំឡើងខ្ពស់ជាងគេ។
- សម្តេចតេជោ ហ៊ុន សែន បានថ្លែងថា បើរៀនមិនកើតកុំបន្ទោសសាលា ឬបន្ទោសគ្រូ ត្រូវបន្ទោសខ្លួនឯងមិនប្រឹងប្រែង។
- សម្តេចតេជោ ហ៊ុន សែន ចង់ឱ្យសិក្សាពីចំនួនមន្ត្រីរាជការនៅប្រទេសស្រីលង្កា ដែលមានចំនួនប្រមាណ ១លាន ៥សែននាក់។ ចំនួននេះសម្តេចតេជោ លើកឡើងថា អាចជាបញ្ហាមួយឱ្យស្រីលង្កាជួបវិបត្តិ។
- សម្តេចតេជោ ហ៊ុន សែន បានថ្លែងថា ការជ្រើសរើសមន្ត្រីរាជការមិនអាចចេះតែរើសបាននោះទេ គឺត្រូវមានការប្រឡងឱ្យច្បាស់លាស់។
- សម្តេចតេជោ ហ៊ុន សែន បានថ្លែងថា ទោះបីសម្តេចអស់អំណាច តែការគ្រប់គ្រងអំណាច គឺនៅតែស្ថិតក្រោមកណ្តាប់ដៃរបស់បក្សប្រជាជនកម្ពុជាជានិច្ច។
- សម្តេចតេជោ ហ៊ុន សែន បានថ្លែងថា ចរិតរបស់សម្តេចមិនប្តូរជានិច្ច គឺឈរការពារសន្តិភាព និងសេចក្តីសុខរបស់ប្រជាពលរដ្ឋ។
- សម្តេចតេជោ ហ៊ុន សែន បានថ្លែងថា ប្រព័ន្ធផ្សព្វផ្សាយដែលជេរប្រមាថ ត្រូវបិទអាជ្ញាប័ណ្ណចោល។
- សម្តេចតេជោ ហ៊ុន សែន បានថ្លែងថា សម្តេចបានផ្តល់ថវិកា ១៨ម៉ឺនដុល្លារ ឱ្យលោក សាន្ត ប៊ុនធឿន ទិញផ្ទះរស់នៅ។
- សម្តេចតេជោ ហ៊ុន សែន បានថ្លែងថា ការបើកបង្រៀនភាសាវៀតណាម នៅសាលាភូមិន្ទភ្នំពេញ គឺផ្តល់ផលចំណេញសម្រាប់កម្ពុជា។
- សម្តេចតេជោ ហ៊ុន សែន បានថ្លែងថា ការបើកបង្រៀនភាសាវៀតណាមនេះ មិនមែនយកនិស្សិតវៀតណាម មកបង្រៀននៅកម្ពុជានោះទេ។
- សម្តេចតេជោ ហ៊ុន សែន បានថ្លែងថា ការបើកបង្រៀនភាសាវៀតណាម ដើម្បីជួយសម្រួលសម្រាប់និស្សិតទៅសិក្សានៅវៀតណាម សម្រួលការធ្វើធុរកិច្ច និងបំពេញការងារផ្សេងៗ។
- សម្តេចតេជោ ហ៊ុន សែន បានថ្លែងថា ដំណើរទស្សនកិច្ចរបស់លោក ហ៊ុន ម៉ាណែត នៅវៀតណាម ការរៀបចំកម្មវិធីជំនួប តិចជាងដំណើរទស្សនកិច្ចនៅជប៉ុន និងសិង្ហបុរី។
- សម្តេចតេជោ ហ៊ុន សែន បានបង្ហាញការសោកស្តាយ ដែលក្រុមអ្នកវិភាគមិនលើកពីដំណើរទស្សនកិច្ចរបស់លោក ហ៊ុន ម៉ាណែត ទស្សនកិច្ចនៅជប៉ុន។
- សម្តេចតេជោ ហ៊ុន សែន បានថ្លែងថា សង្គ្រាមនៅកម្ពុជានឹងផ្ទុះ បើគណបក្សប្រជាជនមិនកាន់អំណាច។ សម្តេចតេជោ ហ៊ុន សែន បានថ្លែងថា មានចំណុចពីរ ដែលនឹងនាំឱ្យផ្ទុះនោះ រួមមាន៖ ការប្រើពាក្យត្រៀមខ្លួនរឹបអូសពីអ្នកមានឱ្យអ្នកក្រ និងត្រៀមវ៉ៃយកទឹកដីដែលបានបាត់បង់។
- សម្តេចតេជោ ហ៊ុន សែន បានថ្លែងទៅកាន់ក្រុមប្រឆាំងថា បើចិត្តសឿងក្នុងកម្មវិធីនយោបាយពេលបោះឆ្នោត ប្រកាសវ៉ៃយកវៀតណាមទៅ ពេលខ្លួនឈ្នះឆ្នោត។
- សម្តេចតេជោ ហ៊ុន សែន ពន្យល់ពិធីការរឿងប្រើប្រាស់ទង់ជាតិ ពេលស្វាគមន៍ភ្ញៀវបរទេស។ សម្តេចតេជោ បានបញ្ជាក់ថា នៅពេលព្រះមហាក្សត្រទទួលភ្ញៀវបរទេស មិនដែលដាក់ទង់ជាតិប្រទេសរបស់ភ្ញៀវនោះទេ។ សម្តេចទទួលភ្ញៀវ ក៏មិនដែលដាក់ទង់ប្រទេសរបស់ភ្ញៀវនោះដែរ។
- សម្តេចតេជោ ហ៊ុន សែន ប្រាប់ទៅក្រុមអ្នកវិភាគថា បើល្ងង់រៀនសូត្របន្ថែម។
- សម្តេចតេជោ ហ៊ុន សែន បញ្ជាក់ថា បេក្ខជននាយករដ្ឋមន្ត្រីនៅកម្ពុជា មិនត្រូវការការគាំទ្រពីប្រទេសណាមួយនោះឡើយ។
- សម្តេចតេជោ ហ៊ុន សែន៖ សង្គ្រាមនៅកម្ពុជានឹងផ្ទុះ បើបក្សប្រឆាំងដឹកនាំ ព្រោះនយោបាយរឹបអូសទ្រព្យអ្នកមានទៅជូនអ្នកក្រ និងវ៉ៃយកទឹកដីបាត់បង់
- សម្តេចតេជោ ហ៊ុន សែន បានថ្លែងថា សម្តេចមិនអនុញ្ញាតឱ្យកូនធ្វើឱ្យបក្ស និងជាតិរលាយនោះឡើយ។
- សម្តេចតេជោ ហ៊ុន សែន និទានរឿងផ្តល់ជាគតិអប់រំថា ការលោភលន់មិនចេះស្កប់ស្កល់នាំដល់ក្តីវិនាសអន្តរាយ។
- ផ្តើមចេញពីបទពិសោធន៍ប្រទេសស្រីលង្កា សម្តេចតេជោ ហ៊ុន សែន បានណែនាំមិនត្រូវឱ្យបុគ្គលិករដ្ឋធំហួសហេតុពេកនោះទេ ខណៈគោលការណ៍ចំណាយគេកំណត់ត្រឹម ៤ភាគរយប៉ុណ្ណោះ។
- សម្តេចតេជោ ហ៊ុន សែន បានដាក់ការសន្និដ្ឋានថា ការដួលរំលំសេដ្ឋកិច្ចរបស់ស្រីលង្កា អាចបណ្តាលមកពីការចំណាយលើមន្ត្រីរាជការ និងកម្លាំងប្រដាប់អាវុធ ដែលមានជិត ២លាននាក់។
Fresh News
