សហអាមេរិក អូស្ត្រាលី និងជប៉ុន ប្តេជ្ញារួមដៃគ្នាប្រឆាំងនឹងចិន
សហអាមេរិក អូស្ត្រាលី និងជប៉ុន ប្តេជ្ញារួមដៃគ្នាប្រឆាំងនឹងចិនរដ្ឋមន្ត្រីការពារជាតិសហរដ្ឋអាមេរិក, អូស្ត្រាលី និងជប៉ុន បានព្រមព្រៀងគ្នាកាលពីថ្ងៃសៅរ៍ ដើម្បីជំរុញកិច្ចសហប្រតិបត្តិការយោធារវាងគ្នាដើម្បីប្រឈមមុខនឹងមហិច្ឆតាដែលកំពុងកើនឡើងរបស់ប្រទេសចិន «ក្នុងការផ្លាស់ប្ដូរសណ្ដាប់ធ្នាប់របស់ពិភពលោក» ។
ទីក្រុងវ៉ាស៊ីនតោនកំពុងដាក់សម្ពាធតាមរយៈការវាយលុកផ្នែកការទូតដើម្បីទប់ទល់នឹងឥទ្ធិពលរបស់ចិននៅទូទាំងតំបន់អាស៊ីប៉ាស៊ីហ្វិក។
រដ្ឋមន្ត្រីក្រសួងការពារជាតិអាមេរិក លោក Lloyd Austin បាននិយាយនៅពេលដែលលោកទទួលស្វាគមន៍សមភាគីអូស្ត្រាលី និងជប៉ុន នៅឯទីបញ្ជាការយោធាអាមេរិកប្រចាំតំបន់ប៉ាស៊ីហ្វិក ក្នុងរដ្ឋហាវ៉ៃ ថា «យើងមានការព្រួយបារម្ភយ៉ាងជ្រាលជ្រៅចំពោះអាកប្បកិរិយាឈ្លានពាន និងការគំរាមកំហែងកាន់តែខ្លាំងឡើងពីសំណាក់ចិននៅច្រកសមុទ្រតៃវ៉ាន់ និងនៅកន្លែងផ្សេងទៀតនៅក្នុងតំបន់»។
លោក Richard Marles រដ្ឋមន្ត្រីការពារជាតិអូស្ត្រាលីបានលើកឡើងថា «ផលប្រយោជន៍របស់យើង គឺស្ថិតនៅលើការលើកស្ទួយសណ្តាប់ធ្នាប់នៃពិភពលោកមួយដែលផ្អែកលើច្បាប់។ ប៉ុន្តែយើងឃើញថា សណ្តាប់ធ្នាប់នៅតំបន់ឥណ្ឌូ-ប៉ាស៊ីហ្វិកកំពុងស្ថិតនៅក្រោមសម្ពាធ ខណៈដែលប្រទេសចិនកំពុងស្វះស្វែងរកការរៀបចំពិភពលោកថ្មីមួយដែលនៅជុំវិញខ្លួន ទៅតាមរបៀបដែលយើងមិនធ្លាប់បានឃើញពីមុនមក»។
កាលពីថ្ងៃព្រហស្បតិ៍ ទីក្រុងវ៉ាស៊ីនតោនបានប្រកាសផ្ដល់ជំនួយចំនួន ៨១០ លានដុល្លារសម្រាប់បណ្ដាប្រទេសដែនកោះនៅមហាសមុទ្រប៉ាស៊ីហ្វិក ដែលសហរដ្ឋអាមេរិកគ្រោងនឹងបង្កើនវត្តមានការទូតរបស់ខ្លួន។
កាលពីសប្តាហ៍មុន លោកស្រីអនុប្រធានាធិបតី Kamala Harris បានធ្វើដំណើរទៅកាន់ប្រទេសជប៉ុន និងកូរ៉េខាងត្បូង ហើយបាននិយាយថា សហរដ្ឋអាមេរិកនឹងធ្វើសកម្មភាពដោយគ្មានការភ័យខ្លាច ឬស្ទាក់ស្ទើរអ្វីទាំងអស់នៅទូទាំងតំបន់អាស៊ី រួមទាំងនៅច្រកសមុទ្រតៃវ៉ាន់ផងដែរ។
ទីក្រុងប៉េកាំងបានចាត់ទុកកោះតៃវ៉ាន់ជាផ្នែកមួយរបស់ខ្លួន ហើយថែមទាំងបានអះអាងកម្មសិទ្ធិលើច្រកសមុទ្រដ៏តូចចង្អៀតនិងមមាញឹក និងដែលជាព្រំដែនបំបែកប្រទេសទាំងពីរនេះទៀតផង។
លោកស្រី Harris បានទៅទស្សនកិច្ចនៅតំបន់គ្មានយោធារវាងកូរ៉េទាំងពីរ។ ដំណើរទស្សនកិច្ចរបស់លោកស្រីត្រូវបានរៀបចំឡើងដើម្បីបង្ហាញពីការប្ដេជ្ញាចិត្តរបស់ក្រុងវ៉ាស៊ីនតោន ក្នុងការការពារកូរ៉េខាងត្បូងប្រឆាំងនឹងកូរ៉េខាងជើង។
លោក Austin ក៏បានរៀបចំកិច្ចប្រជុំទ្វេភាគីជាមួយសមភាគីអូស្ត្រាលីរបស់លោកផងដែរ ដោយបានផ្តោតលើកិច្ចព្រមព្រៀងឆ្នាំ ២០២១ រវាងសហរដ្ឋអាមេរិក អូស្ត្រាលី និងចក្រភពអង់គ្លេស ដែលថានឹងផ្តល់នាវាមុជទឹកដើរដោយថាមពលនុយក្លេអ៊ែរដល់ទីក្រុងកង់បេរ៉ា។
រដ្ឋមន្ត្រីការពារជាតិអូស្ត្រាលីបាននិយាយថា ពេលវេលាដែលខ្លួននឹងទទួលបាននាវាមុជទឹក នឹងជាកត្តាដ៏សំខាន់ក្នុងការសម្រេចចិត្តរបស់ទីក្រុងកង់បេរ៉ា ក្នុងការសម្រេចថាតើខ្លួននឹងត្រូវជ្រើសយកប្រទេសអ្នកផ្គត់ផ្គង់មួយណា។
លោក Marles បាននិយាយថា «វាមានសារៈសំខាន់ជាទីបំផុត ដោយសារតែស្ថានភាពយុទ្ធសាស្ត្រដែលអូស្ត្រាលីកំពុងប្រឈមមុខ ពោលគឺនឹងមានការវិវត្តនៃសមត្ថភាពនាវាមុជទឹកនៅក្នុងប្រទេសអូស្ត្រាលី រវាងពេលនេះ និងនៅពេលដែលនាវាមុជទឹកដំបូងបានមកដល់»។
នាវាមុជទឹកដែលដើរដោយថាមពលនុយក្លេអ៊ែរ ទំនងជានឹងផ្តល់ឱ្យអូស្ត្រាលីនូវសមត្ថភាពក្នុងការធ្វើប្រតិបត្តិការកាន់តែសម្ងាត់ជាងមុន ព្រមទាំងបំពាក់ដោយមីស៊ីលទំនើបៗ ដែលនឹងបង្កការរារាំងកាន់តែច្រើនដល់ទីក្រុងប៉េកាំង។
ការជ្រើសរើសប្រទេសអ្នកផ្គត់ផ្គង់ណាមួយ គឺនឹងមានឥទ្ធិពលផ្នែកសេដ្ឋកិច្ចយ៉ាងសំខាន់ ហើយក៏នឹងផលប៉ះពាល់ជាយុទ្ធសាស្ត្រផងដែរ ពោលគឺវានឹងធ្វើឱ្យកងទ័ពជើងទឹកអូស្ត្រាលីកាន់តែមានភាពជិតស្និទ្ធជាមួយនិងប្រទេសដែលខ្លួនបានជ្រើសរើសទិញនាវាមុជទឹក៕
The Citizen
