ដឹងអត់ថា ហាងកាត់សក់ដំបូងបង្កើតនៅឯណា?
ដឹងអត់ថា ហាងកាត់សក់ដំបូងបង្កើតនៅឯណា?ហាងកាត់សក់ដំបូងៗ ត្រូវបានមជ្ឈដ្ឋានជឿថា ត្រូវបានបង្កើតឡើងនៅក្រិកសម័យបុរាណ (២០០០ មុនគ.ស-១៣៣ មុនគ.ស)។
(អ្នកប្រាជ្ញក្រិក Socrates (ឆ្វេង) Plato (កណ្ដាល) និង Aristotle (ស្ដាំ))
ក្រិកបុរាណត្រូវបានគេឯងទទួលស្គាល់ថាជាប្រភពមួយយ៉ាងសំខាន់នៃកំណើតទស្សនវិជ្ជា វិទ្យាសាស្ត្រ និងរបបនយោបាយសង្គមដែលនៅតែមានឥទ្ធិពលដល់សព្វថ្ងៃ។ កត្តាដែលនាំឲ្យមានការបង្កើតនូវគំនិតថ្មីៗជំនាន់នោះ មួយផ្នែកធំគឺកើតឡើងពីការជជែកពិភាក្សាដេញដោលគ្នា។ ដោយសង្គមក្រិកបុរាណមានបរិបទបែបនេះ ទើបធ្វើឲ្យការបង្កើតឡើងនូវកន្លែងមួយចំនួនដែលអាចយកទៅធ្វើជាវេទិកាដើម្បីឲ្យមនុស្សមានឱកាសជុំគ្នាដើម្បីពិភាក្សាគំនិត និងរបកគំហើញរបស់ពួកគេ។ ហាងកាត់សក់ក៏ស្ថិតក្នុងចំណោមកន្លែងទាំងអស់ហ្នឹងដែរ។
ក្នុងក្រិកបុរាណ បុរសច្រើនមានម៉ូតសក់ និងពុកចង្ការួញអង្កាញ់ៗ ដែលម៉ូតបែបនេះត្រូវការជាចាំបាច់នូវការថែទាំមួយចំនួនដូចជា កាត់តម្រឹម មូលរួញ ធ្វើឲ្យក្រអូប និងសិត ជាប្រចាំពីសំណាក់ជាងកាត់សក់។ ក្រៅពីសេវាកម្មទាំងនេះ ជាងកាត់សក់ក៏បានផ្ដល់ជូនដល់ភ្ញៀវនូវ ការម៉ាស្សា និងការថែទាំសម្រស់មួយចំនួនទៀត។
បន្ថែមពីការថែសក់ ពុកចង្កា និងសម្រស់ខ្លួន បុរសក្រិកបុរាណក៏បានយកកន្លែងកាត់សក់ធ្វើជាវេទិកាសម្រាប់ជួបជុំមិត្តភ័ក្ដិ បងប្អូន ក្រុមការងារ ដើម្បីជជែកពិភាក្សាពីកិច្ចការផ្សេងៗទាក់ទងនឹងនយោបាយ ទស្សនវិជ្ជា និងមុខជំនួញរកស៊ីជាដើម។
លុះដល់អំឡុងឆ្នាំ ៣០០ មុនគ.ស នៅពេលដែលក្រិកក្រោមការដឹកនាំរបស់ស្ដេចសង្គ្រាម Alexander the Great (ដឹកនាំពីឆ្នាំ ៣៣៤ ដល់ ៣២៣ មុនគ.ស) បានធ្វើវាតទីទឹកដីជាច្រើន ប៉ុន្តែបានចាញ់សមរភូមិមួយចំនួនក្រោមថ្វីដៃពួកពែក្ស (អាណាចក្រដែលមានទឹកដីមួយចំនួនធំគ្របដណ្ដប់លើអ៊ីរ៉ង់បច្ចុប្បន្ន)។ ការចាញ់នេះ មួយផ្នែកគឺដោយសារតែដោយទ័ពក្រិកបានទុកពុកចង្កាវែងពេក ដែលងាយស្រួលធ្វើឲ្យទ័ពពែក្សងាយស្រួលក្នុងការទាញទម្លាក់ពីលើសេះ ក្នុងអំឡុងពេលចម្បាំង។ នៅពេលនោះ Alexander the Great ក៏បានចេញបញ្ជាឲ្យទាហានទ្រង់កោរពុកចង្កាចោល។ យូរទៅ ការកោរពុកចង្កាក៏បានក្លាយជាម៉ូតពេញនិយមសម្រាប់បុរសទូទៅនៅក្រិកបុរាណ ដែលជាហេតុធ្វើឲ្យពួកគេឧស្សាហ៍ទៅហាងកាត់សក់។
គំនិតនៃការបង្កើតហាងកាត់សក់ក៏បានចាប់ផ្ដើមពីពេលនោះមក រហូតសាយភាយទៅបណ្ដាប្រទេសជាច្រើនទូទាំងពិភពលោក ដូចដែលបានឃើញសព្វថ្ងៃ៕
